8 мартыште, Ӱдырамаш пайрем кечын, Марий Элыште физкультурно-поро кумыл акцийым эртареныт. Тудо «Мандарин куржталмаш» маналтын.
Акций Йошкар-Олаште илыше кум ияш Коля Кузнецовлан шерге операцийым ышташ ача-аважлан полшымо шот дене эртаралтын.
Такшым тыгай спорт мероприятийым эртарымаш йӱлаш пурен. Тудлан тӱҥалтышым Йошкар-Олаште скандинав коштмашын («Пойдём ходить по Йошке!») да куржталаш йӧратыше-влакын («Айвика») клубышт ыштеныт.
Благотворительный взносым ыштыше кажне участниклан шарнымашеш мотор значокым (туштыжо Коля Кузнецовын фотожо ден мандарин сӱрет улыт) да кажне 1,5 километрым эртыме верыште мандариным кучыктеныт. Акцийыш ушнышо-влак 60 минут куржталыныт да скандинав коштмаш дене эртеныт. Тыге южыжо кандаш мандариным поген шуктен.
Волонтёр-влакын палемдымышт почеш, К.Кузнецовлан эмлалташыже ача-аважлан 20350 теҥге оксам поген пуэныт.
Е.Эшкинина.
