Т.Евсеев лӱмеш национальный тоштерыште сӱретче да ювелир Виталий Кирилловын ончерже почылтын.
Тудо «Ювелир мастарын пашаже» маналтеш. Марий сылнештарышым ыштыше тыгай мастар-влак мемнан кундемыште шукынжак огытыл, парня дене шотлен лукташ лиеш. Ик эн сайын палымыже Виталий Александрович, очыни. Параньга районысо Кошпай ялын эргыже изиж годым куштышо лияш шонен, но пӱрымаш тыге савыралын: тудо сӱретче лийын. Пошкудо Чуваш кундемысе И.Я.Яковлев лӱмеш художественно-педагогический институтын художественно-графический факультетшым тунем лектын. Ятыр вере пашам ыштен, но творческий шӱлышыжӧ ӱмырешлан пеленже кодын. Тудо сӱретла, скульптурым, чеканкым ышта, пу гыч пӱчкеда. Фотопашалан шӱман, пеленже эре фотоаппаратым коштыкта. Тыгак эше мура да баян дене сайын шокта. Чылажат чонжо йодмо почеш, палемда шкеже.
Шукерте огыл тудлан 70 ий темын. Ты ончер лӱмгечыжланак пӧлеклалтын. Пытартыш жапыште тудо утларакшым марий шӱлышан ювелир сылнештарышым шуко ышта. Тидлан ятыр жапым ойыра. Шке жапыштыже тидлан тудо тоштерыште аралалтше археологий экспонат-влак дене палыме лиймеке кумылаҥын. Эшежым изажат ший гыч тӱрлӧ сылнештарышым ыштен улмаш. Чыла ювелир пашаже марий шӱлышан улыт. Тидлан тудо шергакан, пеле-шергакан тӱрлӧ кӱм, мельхиорым, шийым, южгунам шӧртньым кучылтеш. Шкак келшен толшо формым ышта, орнаментым кычалеш, сӱретла… Кызыт тудо утларакшым ший сылнештарышым ышта. Вет тудым марий калык эре жаплен. Калыкнан традиционный изобразительный формыжлан, орнаментшылан эҥерта. Санденак тудын ыштыме шергашыже, пылыш кӧржшӧ, тӱрлӧ оҥсакышыже, кидшолыжо, брошкыжо, чынжымак, пеш сылне, сымыстарыше улыт. Таклан огыл марий артист, тыглай еҥ-влакат тудын деке ты але вес сылнештарышым ышташ йодмаш дене лектыт.
С.Носова.
М.Скобелевын фотожо.
