«Фиеста Парк» ден «Фиеста Парк Активити» шке рӱдерыштышт Йошкар-Оласе йоча эмлымверын онкогематологий отделенийыштыже эмлалтше ӱдыр-рвезе-влаклан модышым погымо боксым вераҥденыт.
– Онкогематологий отделенийыште кече еда тӱрлӧ процедурым эртыше йоча-влак мом гына огыт чыте!– манеш Паркын директоржо Сергей Семёнов. – Ойышт почеш, нуно пункцийым, перевязкым ыштыме, ургышым обработатлыме кабинетлаште эн чот лӱдыт. Южо икшыве эсогыл врач деч шылеш. Тидымак шотыш налын, кодшо ийын отделенийышке юзо коробкам шындыме. Неле илыш йыжыҥыште улшо ӱдыр-рвезе-влаклан чыла йӧсым лӱддымын да куштылгын эрташ лийже манын, «Лӱддымылык коробкашке» корштымым чыташ полшышо, шинчавӱдым куаныш савырыше модыш-влакым жапын-жапын оптымо. Ме тиде йӱлам умбакыже шуйынена. Юзо коробкам ярсыме семын темынена.
Тыгай сынан коробка Российысе ятыр эмлымверыште уло. Икшывылан ямдылыме пӧлек эмлымверыште кечын катыкемеш гын, рӱдерысе боксат кечын пойдаралтшаш. Модышым контейнерыш пыштен, эмлымверыште неле процедурым эртыше йочан кумылжым кажне еҥ кеч икмыняр татлан нӧлталын кертеш. Тиде пушкыдо огыл чылт у модыш, фломастер, усталык набор, конструктор, погремушко, кубик, книга, пазл да молат лийын кертыт.
Контейнер-влак тыгай адрес дене верланат:
«Фиеста Парк», «Планета» ужалыме рӱдер, 4 пачаш;
«Фиеста Парк Активити», «Планета Мебели» мебель комплекс, 3 пачаш.
М.ИВАНОВА.
