Морко районысо Унчо кундемыште таза илыш-йӱла верч тыршымаш эреак ончыл верыште лийын да кызытат тыгак. Спортым йӧратыше да пагалыше-влак кокла гыч Хмелёвым палемдаш лиеш.
Вениамин Семенович — ура чонан, марий шӱлышан пӧръеҥ. Тудо кеч-могай пагытыштат капкылым шуараш жапым да йӧным муэш. Куржталмаштат, ече дене таҥасымаштат, хоккей дене модмаштат тудо — ик эн тале коклаште.
Хоккей тӱняште 17-ше модмо номер чылалан палыме да йӧратыме, молан манаш гын лач тыгай номер дене ХХ- шо курымысо ик эн мастар хоккеист Валерий Харламов модын. Тиде модмо номер денак Вениамин Унчо кундемын хоккей командыжын лӱмжым арала. Ийгот дене чылт самырыкшак огыл гынат, модмо пасушто шкенжым моло хоккеист-влак ден иктӧр куча.
Вениамин Семенович шукерте огыл вачӱмбакше 60 ийым пыштыш. Шочмо кундемыштына тудын юбилейжылан пӧлеклалтше ече дене таҥасымаш эртен. Тушко школышто тунемше ден ечын ӱшанле йолташыже-влак кумылын ушненыт. Тиде спорт мероприятийым эртарыме чыла роскотым юбиляр шке ӱмбакше налын.
Унчо селаште чолга мер пашаеҥ Геннадий Савельевич Григорьевын тыршымыжлан кӧра жапше годым хоккей дене модаш коробко чоҥалтын. Рвезе-влакым спортын тиде видшылан кумылаҥдаш Вениамин Семенович уло вийжым пыштен, модаш туныктен.
Ӱмаште хоккеист-влакын тыршымышт да «Передовик» ял озанлык артельын полышыж дене у хоккей коробко пашам ышташ тӱҥалын. Тиде, мутат уке, Унчо командылан у шӱлышым пуэн. Ялысе команде шым турнирыште вийжым терген. Кокытшо Унчо хоккей площадкыштак эртаралтын. Тиде ийын туныктышыштлан тауштен, Унчо хоккеист-влакат Вениамин Семёновичын лӱмгечыжлан пӧлеклалтше турнирым эртареныт. Тушко Морко посёлко, Параньга районысо Олор да Татарстан кундемысе Шаши ялла гыч хоккеист-влак
ушненыт. Таҥасымаш моткоч виян эртен. Иктешлымаш почеш, Морко команде икымше, Унчо — кокымшо вер дене палемдалтыныт, а Олор гыч уна-влак кумшо верыш лектыныт.
Спорт мероприятий деч вара участник-влак Вениамин Семеновичын пелашыжын ямдылыме тамле палышыжым шокшо вуйдеҥге чай дене тамленыт. Лач тыгай келшымаш кумылым вияҥдаш полшен.
М.Александров.
Авторын фотожо.
