Теҥгече Марий Эл Республик здравоохраненийым вияҥдымашке кугу надырым пыштыше, 55 ий врач-педиатрлан ыштыше, Россий Федерацийын да Марий Элын сулло врачше, Россий здравоохраненийын отличникше, Йошкар-Олан почётан гражданинже, Йошкар-Оласе йоча эмлымверын тӱҥ врачше Л. Соколован шочмыжлан 80 ий темын. Тидын дене келшышын, Йошкар-Оласе йоча эмлымверыште Лелия Ивановналан мемориал оҥам почыныт.
Лелия Ивановнан тыршымыж дене Йошкар-Олаште йоча тазалыкым аралыме тӧнеж-влак сетьым ыштыме, ты шотыштак 4-ше да 5-ше №-ан поликлинике-влакым, 1-ше №-ан поликлинике пелен восстановительный эмлымаш отделенийым, 1-ше да 4-ше №-ан шӧр кухньо-шамычым. 2015 ийыште специализироватлыме да диагностике полышым пуымо 3-шо №-ан у йоча поликлиникым пашашке колтымо. Стационар службышто кызыт гына да жап деч ончыч шочшо аза-влакын патологийышт отделенийым, реанимаций да интенсивный терапий палатым, чумыр республикысе йоча эмлалт кертме онкогематологий отделенийым почмо. 2010 ийыште 1-ше №-ан поликлинике пелен Тазалык рӱдерым ыштыме, вараже тудым 3-шо №-ан поликлиникыш кусарыме.
Торжественный мероприятийыште Марий Эл Республикын тазалыкым аралыме министрже М.Панькова, «Йошкар-Ола» ола кундемым вуйлатыше, Депутат-влак погынымашын председательже А.Принцев, Йошкар-Олан мэрже Е.Маслов, Йошкар-Оласе йоча эмлымверын тӱҥ врачшын пашажым жаплан шуктышо Ю.Зейтулаева лийыныт, лӱмлӧ да пагалыме врачым порын шарналтен, шуко сай шомакым ойленыт.
Мемориал оҥам «Йошкар-Ола» ола кундемым вуйлатыше, Депутат-влак погынымашын председательже А.Принцев ден Йошкар-Олан мэрже Е.Маслов почыныт.
М.ИВАНОВА.
