Роспотребнадзорын Марий Элысе виктемжын тыршымыж дене, сайтлаште чын огыл адресым ончыктен, калыклан сатум ужалыше продавец-шамычым пален налме.
Еcco-shoes.ru.com, pokupochkii.ru, lol.mag-skidka.ru сайтлаште сатум темлыше шуко продавецын адресшым чын ончыктымо огыл. Тиде увер Роспотребнадзорын Марий Элысе виктемышкыже чуваш коллеге-влак деч пурен. Рашемденрак палемдаш гын, «ТоргСервис» ООО пуйто Чебоксар оласе Марпосадский шоссе уремын 1-ше пӧртыштыжӧ верланен. Но тиде адрес дене пашам ыштыше «Метрополис» ужалыме рӱдерын собственникше тыгай организаций улмым пеҥгыдемден огыл, мӧҥгешла, шӧрен гына.
Роспотребнадзорын Хакасий Республикысе виктемжат torgplaza.com сайт гоч сатум ужалыше «ТоргПлаза» ООО-м Абакан ола, Фабричный урем, 27, литера а2, 2-шо пӧлем адрес дене муын огыл.
Начар качестван сатум налме да вараже тудым вашталтен, пӧртылтен кертме деч Роспотребнадзорын Марий Элысе виктемже потребитель-шамычлан сайын тергыме сайт ден продавец-влаклан гына ӱшанаш темла.
М.ИВАНОВА.
