Звениговысо краеведений тоштерыште 20 февральыште сӱретче ача ден эрге – Алексей ден Олег Богдановмытын «Акварелян тукым кыл» усталык касышт эртен.
Тушко Звениговысо йоча искусство школын художественный отделенийыштыже тунемше, районысо сӱретче да художественный усталыкым аклыше-влак чумыргеныт, палдарат тоштер пашаеҥ-влак.
Тоштерын выставке залыштыже лач тыгай лӱманак ончерым чумыреныт. Выставкыште еҥ-влаклан аклаш профессионал сӱретче-влак – Кугу Отечественный сарын участникше Алексей Иванович ден эргыже Олег Алексеевич Богдановмытын — акварель пашашт ончыкталтын.
Алексей Иванович шке сӱретлаштыже утларакше шочмо мландыжын сылнылыкшым ончыкта. Пашалаштыже шочмо кундемжым йӧратыме, патриотизм шӱлыш раш палдырнат. Шкеже тудо Параньга районысо Кӱшыл Осыялыште 1924 ийыште шочын. Сарыште Берлин марте миен шуын, Белоруссийысе, Польшысо, Эрвел Пруссийысе да Германийысе ола ден села-влакым утарымаште лийын. Лӱддымылыкым ончыктымыжлан «За отвагу», «За взятие Кенисберга», «За Победу над Германией», тыгак моло ятыр медаль дене палемдалтын, Верховный главнокомандующий И.В. Сталинын тауштымашыжат лийын.
Сар гыч пӧртылмекше, Чувашийысе кугыжаныш педагогический институтым тунем лектын да Параньга кыдалаш школышто рисований ден черченийым туныктен. 1985 ий гыч Звенигово олаште илен. Ӱмыржӧ 1998 ийыште кӱрылтын.
Усталык касыш чумыргышо-влак Олег Алексеевичын ачаже, тудын творчествыж нерген каласкалымыжым тӱткын колыштыныт. А Олег Богданов шкеже Эстонийысе художество академийыште шинчымашым поген, 4000 утла пашан авторжо. Тудо 1960 ий 5 октябрьыште Параньга районысо Матародо селаште шочын. Сӱретлаш изиж годымак тӱҥалын. Икымше сӱретше-влак эсогыл 5 ияшыж годымак районысо газетыштышт ончыкталтыныт. Параньга кыдалаш школ деч вара оформительлан пашам ыштен, вара армийыш миен толын. Тылеч вара республикысе художественный училищыште шинчымашым поген. Умбакыже корныжо Эстонийыш шуйналтын. Кызыт Олег Алексеевич Звенигово олаште ила, Москваште пашам ышта — сӱрет-влакым войза, оформитель семын тырша.
Погынышо-влак кокла гыч ятырын выставке нерген поро мутым ойленыт.
Л.Камалетдинова.
