Инноваций сынан туныктымо программым илышыш шыҥдарыше школ-влаклан полышым пуаш Марий Элын правительстыже грантым палемден.
Республикын образований да науко министржын алмаштышыже А.Иванов тидлан кум миллион теҥгем ойырат манын каласен. Кум эн сай оласе школлан (650 икшыве деч шагал огыл тунемшаш) 500 тӱжем теҥге дене ойырат. Посёлкысо кум эн сай школлан (500 икшыве деч шагал огыл тунемшаш) 300 тӱжем теҥге гыч пуат. Селасе кум эн сай школлан (100 икшыве деч шагал огыл тунемшаш) 200 тӱжем теҥге гыч ойыралтеш. Оксам республикын резервный фондшо гыч налыт.
Шийвундо учебникым налаш, туныктымо да воспитатлыме средствалан, школын кадр куатшым вияҥдаш кая. Пытартыш пунктшо договор почеш целевой направлений дене тунемше самырык педагог-влакым школыш пашам ышташ толаш таратышаш.
Школым шым критерий почеш ойырат. Нунын коклаште — кӱкшӧ качестван образованийым пуымаш, выпускник-влакын регионысо профессиональный организацийлаш тунемаш пурымышт, молат.
Конкурсым оргкомитет эртара. Тудым республикын правительствыже пеҥгыдемда. А эксперт оценкым Марий Элын педагогшо-влак шке шындат. Отборочный тур 12 гыч 26 февраль марте лиеш. Иктешлымашым 15 март деч вараш огыл ыштат, оксам сеҥыше-влакын счетышкышт 15 май деч вараш огыл колтат.
Ушештарена, эн сай школ-влаклан грантым ойыраш темлымашым Марий Эл вуйлатыше А.Евстифеев 17 январьыште республикысе Министр-влак кабинетын заседанийыштыже каласен.
Л.ШАБДАРОВА ямдылен.
