Морко районысо Коркатово лицейын 264 выпусникше Российысе 15 тӱрлӧ вузышто врачлан тунемеш. Шукерте огыл лицей «Ведущие образовательные лицеи России» реестрыш пурен. Тыгай кӱкшытым налмаште туныктышо-влакын надырышт кугу.
— Тений республикыште олимпиадын муниципал этапыштыже тунемшына-шамыч 53 призовой верым налыныт. Нунын кокла гыч шымытын икымше верыш лектыныт. Кодшо тунемме ийыште кок тунемшына Россий олимпиадыште уш-акылжым ончыктен. Тыгак гуманитарно-правовой кадет классым почынна. Нуным военрук Вячеслав Васильев вуйлата. Тушто 20 ӱдыр-рвезе тунемеш. Морко районышто МВД пашаеҥ ден участковый огыт сите. Сандене кадет классым почынна. Нуно умбакыжым тале специалист лийыт, шонена. Вузым тунем лекме деч вара мӧҥгӧ пӧртылыт, — мане лицейын завучшо Геннадий Арганяков.
М.СКОБЕЛЕВ.
Авторын фотожо.