ШКОЛ ЙОЛГОРНО

Уста туныктышо: «Йылмынам арален кодаш тыршена»

 Оршаке район Нужавлак школыш мийыме годым мемнам школ директорын алмаштышыже-влак порын вашлийыч. Нунын дене кутырымо годым иктыжын марла лывыргын да яндарын мутланымыже чонымак савырыш. Тиде ӱдырамаш марий йылмым туныкта, шоналтышым семынем. Тыгак лекте. Палыме лийна. Людмила Михайловна Пирогова тыште ынде нылымше ий паша ышта улмаш. 

— Иканаште икмыняр предметым туныктеда, директорын алмаштышыжлан тыршеда. Ик паша весылан чаракым огеш ыште?

— Кеч-могай пашаште нелылык уло. Поснак кок сомылым наҥгает гын. Тачысе жапыште туныктышылан кагаз дене моткоч шуко шинчылтман: отчет, молат. А директорын алмаштышыже семын тӱрлӧ документ дене пашам ыштыман. Туге гынат пашам келша, вет йочалан шинчымашым пуэн кертме нимо деч коч шерге.

Икмыняр  предметым туныктымат  мылам ок мешае, мӧҥгешла, пашам ышташ, ончыко каяш, у шинчымашым налаш кумылаҥда. Марий йылме, сылнымут деч посна руш йылме ден сылнымутым, ИКН-ым вӱдем. Но пӱрымаш мыйым школыш вик огыл конден. Оршанке педколледжым тунем пытарымеке, клубыштат, йочасадыштат пашам ышташ логалын. Туге гынат ом ӧпкеле. Икмыняр профессийыште шкем терген ончымо мылам кызыт кугу полышым пуа.

— Те тӱҥалтыш классыште туныктышо лияш шоненда, а кызыт марий йылмым туныктеда.

— Марий йылмым школышто тунеммем годымак туныкташ шоненам. Очыни, Юмо чоныштем нумал коштмо шонымашем илышыш шыҥдараш полшен.  Шкем вес профессийыште ик ганат ужын омыл. Изинек туныктышын корныжым ойырен налынам да ты шонымашем деке ошкылынам. Тыште икымше туныктышем Зоя Ивановна Ёлкинан да марий йылмым туныктышо  Анна Алексеевна Емельянован надырышт кугу. Нунылан кугу таум каласем.

— Школыштыда вашлиймашым эртарыме годым йоча-влакын марла шагал мутланымышт шижалте. Тендан шонымаште, тиде мо дене кылдалтын?

— Очыни, тыгай нелылык дене таче ятыр школышто вашлиялтыт. Ий гыч ийыш икшыве-шамыч марла шагалрак да шагалрак кутырат. Эн ончыч тиде еш денат кылдалтын. Ача-ава мӧҥгыштӧ йоча дене шукыжым рушла гына кутыра, сандене шочмо йылмышт эркын мондалтын толеш. Туге гынат школыштына марий йылмым кугыжаныш семын огыл, а шочмо йылме семын туныктена. Икшывылан марий йылме урокышто оҥайрак лийже манын, тӱрлӧ йӧным кучылтына.: модына, Интернет дене пайдаланена, инноваций йӧным пуртена. Санденак вес калык гыч лекше йоча-шамычат марла тунемыт. Нунылан нелырак гынат, вуйым огыт шупш, тыршат.

Кумданрак — «Марий Эл» газетын
2018 ий 20 февральыште лекше номерыштыже лудын кертыда.

Лидия ШАБДАРОВА.
М.Скобелевын фотожо.

Опубликовать в Одноклассники

Добавить комментарий