Иктаж 15 ий ончыч ординаторскийыш приёмный покой гыч медсестра куржын пурыш:
– Пеш неле пациентым кокымшо операционныйыш пуртышна!
Мый – тушко, бригаде погыненат шогалын. Ӱстембалне куд ияшрак ӱдыр кия. Чийымем, стерилизоватлалтмем жапыште можым-кузежым умылкалышым. Ныл еҥан еш автоаварийыш логалын. Ача, ава да йыгыр йоча: ӱдыр ден рвезе. Эн чот ӱдыр сусырген, вӱрымат шуко йомдарен. Кок-кум минут гыч вӱрын анализшым кондышт, тудын дене пырля – начар уверым: лачшымак кумшо положительный вӱр эмлымверыште кызыт уке. Мом ышташ? Ӱдыр койын шула, сандене кажне минут шергакан. Ача-ава вӱрым тергышна: ачан – кокымшо группо, аван – нылымше. Йыгыр пелашыже нерген шарналтышна. Тудын, конешне, кумшо положительный!
Нуно приёмный покойын теҥгылыштыже шинчат. Ава шортеш, ача кагаз гай ошемын, эрге кумылдымо, ынде мо лиеш манше гай тышкыла да тушкыла онча… Шинчам тудын шинчаж дене тӧр лийже манын, рвезе ваштареш чӱчырнен шинчым.
– Тыйын шӱжарет чот сусырген, – маньым мый.
– Палем, – рвезе нержым шупшыльо, шинчавӱдшым мушкындыж дене ӱштыльӧ. – Тудо вуйжо дене чот перныш… Утен каен шорто, а вара мален колтыш.
– А тый тудлан полшынет?
Рвезе вуйжым савалтыш.
– Тугеже ме тудлан тыйын вӱретым налшаш улына.
Рвезе шортмыжым чарныш, ала-мом шонкален, йырым-йыр ончале, нелын шӱлаш тӱҥале да адакат, оем дене келшен, вуйжым савалтыш. Мый кидем дене медсестрам ӱжым.
– Тиде Света ака. Тудо тыйым процедур кабинетыш наҥгая да вӱретым налеш. Света ака тидым пеш сайын ыштен мошта, корштымым йӧршын от шиж.
– Йӧра, – рвезе келгын шӱлалтыш да аважым ӧндале. – Мый тыйым чот-чот йӧратем, авай! Тый эн сай улат!
Вара ачаж деке лишеме:
– Тыйымат, ачай, чот йӧратем. Велосипедым пӧлеклыметлан тау.
…Операций деч вара ӱдырым реанимацийыш наҥгайышт, мый ординаторскийыш ошкыльым. Шинчамлан процедурный кабинет омса вишыште одеял йымалне кийыше изи герой перныш. Вӱрым налме деч вара Света тудым каналташ пыштен. Мый рвезе деке пурышым.
– А Катя кушто? – йодо рвезе.
– Тудо мала. Шӱжарет дене ынде чыла сай лиеш. Тый тудын илышыжым утарен кодаш полшышыч.
– А мый кунам колем?
– Ну… чот-чот шоҥгеммекет.
Ончычшо рвезын пытартыш йодышыжым шым умыло, но вара вуем гыч пуйто ӱш дене перышт: тудо вӱрым налме деч вара колем манын шоненыс!.. Сандене ача-аваж дене чеверласен. Колем манын шоненак, шке илышыжым шӱжарже верч пуаш ямде лийын. Умыледа, могай подвигым ыштен?
Тиде историйым шарналтымем еда могыр коваштемлан кызытат копы- ы- ыж чучын колта.
М.ИВАНОВА ямдылен.
