Кодшо кугарнян М.Шкетан лӱмеш марий национальный драме театрыште «Ме марий улына! 1918-ше ийысе марий калык толкын нерген» шанче-мер форум эртен.
Марий Эл Республикым вуйлатыше Александр Евстифеев тудын участникше-шамычлан саламлымашым колтен ыле. Тудым Марий Эл Республик правительстве председательжын икымше алмаштышыже Михаил Васютин лудын пуыш. «Глобализаций условийыште шуко калыклан шкенжын духовный поянлыкшым арален да пойдарен толмо йодыш пӱсӧ кодеш. Марий калык шке йӱлаже-влакым шотлен ила да историйжым арала. Чыла тидыже калыкнам ушаш полша», — палемден тудо. Форумыш погынышо-влакым республикысе Марий юмыйӱла ушемын тӱҥ онаеҥже Александр Таныгинат саламлаш миен.
1918 ийыште, 100 ий ончыч, марий мер толкын негызлалтын да вияҥаш тӱҥалын. Тидлан пӱтынь Российысе марий погынын да областной марий погынын пунчалышт полшеныт. Форумышто вич шанчыеҥын докладше йоҥгалтын. Нуно эртыше жапыш пӧртылтеныт. Докладчик-влак тунамсе марий ончылъеҥ-влакын суапыштым шарналтеныт, калыкналан вияҥаш полшышо надырыштым палемден коденыт.
Пӱтынь Российысе марий погынлан 100 ий теммылан пӧлеклалтше форум «Марий ушем» организацийын сопредседательже Георгий Петров-Чоткарын темлымыже да Марий Эл вуйлатыше Александр Евстифеевын полшымыж почеш эртаралтын. Тушто доклад-влак веле огыл йоҥгалтыныт. Кокымшо ужашыже «йыргешке ӱстел» йыр мутланымаш семын эртен. Залын кок велныже лӱмын микрофон-влакым вераҥденыт. Кажныже шке шонымашыжым луктын ойлен кертын. Мутланымаш тӱҥ шотышто марий мер толкынысо организаций-влакын вийыштым иктыш ушаш кӱлмӧ нерген каен.
С.Носова.
Н.Любимовын фотожо.
