12 февральыште Москвасе суд Марий Эл Республикын ончычсо вуйлатышыже Леонид Маркеловын арест жапшым 13 апрель марте шуйымо нерген Басманный судын лукмо пунчалжым закон дене келшышын ыштымылан шотлен.
Тиде кече марте тыгак «Телекомпания 12 регион» ООО-н директоржо Наталья Кожановат петырымаште шинчаш тӱҥалеш, палдара правовой да судебный увер Российысе агентстве. Кеч Маркеловын интересшым аралыше-влак арест жапым шуйымылан судыш вуйшиймашым возеныт улмаш. Но 12 февральыште эртыше судышто тудым шуктыде коденыт.
Ушештарена, Леонид Маркелов ден Наталья Кожанован Москвасе «Лефортово» СИЗО-што апрель кыдал марте шинчышашышт нерген тений 11 январьыште лийше судыштак пунчалым луктыныт.
Л.Камалетдинова.
