Тачысе лаштыкнан унаже – Морко район Чодыраял кундемын ӱдыржӧ Ксения Дмитриева. Тудо Йошкар-Оласе медицине колледжыште медсестралан 4-ше курсышто тунемеш. Шукерте огыл Ксениялан сайын тунеммыжлан, тӱрлӧ конкурсышто, спорт таҥасымаште ссузын чапшым аралымыжлан именной стипендийым кучыктеныт.
— Медикын профессийже моткоч кӱлешан да почётан. А тыйым тиде специальность мо дене сымыстарен?
— Мыйын авам ФАП-ыште пашам ышта. Акушеркын, патронажный медсестран сомылжым иканаште шукта. Пункт пошкудо ялыште верланен, сандене, фельдшер-акушер пунктыш миен шуаш манын, эртен кудалше машинам шогалтыман. Туге гынат авамым нелылык ок лӱдыктӧ, вет тудо сомылжым йӧрата. Лач авамак мыйым ты профессийлан шӱмаҥден да колледжыш тунемаш пураш таратен. 14 ияш улмем годым мылам ойырен налме специальностем келша але уке манын сайын умылен омыл. Кызыт палем: илышем медицине денак гына кылдынем. Умбакыжым вузыш кардиологлан тунемаш кайынем. Авамлан чын корным ончыктымыжлан кугу таум ойлем.
— Ончыкылык пашат тазалык дене кылдалтын, шкежат таза илыш-йӱлам кучет?
— Школышто ече дене коштынам, куржталынам. Колледжыш тунемаш пурымо годым идалыкат пеле тӱрлӧ таҥасымаште ссузын чапшым ече да многоборьеште араленам. Вара нелын черланенам, сандене спортым ик жаплан кодаш логалын. Туге гынат таза илыш-йӱлам кучаш тыршем, но таҥасымашлашке ом ушно.
— Палем, тый сӱретлашат йӧратет…
— Чын, мылам сӱретлаш моткоч келша. Школышто сӱретче лияш шоненам, но ты корно дене каяш ача-авам тореш лийыныт. Садлан кызыт жап лийме да чон йодмо годым гына сӱретлем. Тыгак куштем, мастарлыкем флешмобыштат ончытенам.
— Кызыт тый «Самырык профессионал-влак» конкурсышто виет тергенат. Тушко ушнаш тыйым мо таратен?
— Шкемым могай профессионал улмем тергенам, вет тушто тӱткӧ лийман да чыла заданийым кӱчык жапыште да сайын ыштен шуктыман. Психологий могырым чытыш кӱлеш. Тидат ончыкылык пашаштем кӱлеш лиеш. Тыгак конкурсыш ушнаш Борис Гудым лӱмеш стипендийым кучыктымат таратен.
— Шижалтеш, тый марий шӱлышан улат. Тугеже каласе, молан тений самырык-влак шочмо йылмышт дене шагал мутланат?
— Шукыж годым ӱдыр-рвезе-влак еҥын мом каласымышт деч лӱдыт, сандене уремыште марла огыт мутлане. Мутат уке, мый тидым ом умыло, мый чыла вере марла кутырем.
— Тенийсе пагытыште ятыр ӱдыр-рвезе иканаште пашам ышта да тунемеш…
— Мыйын шонымаште, сай специалист лийнет гын, поснак медициныште, уло жапым тунеммылан ойырыман. Санденак мый тунемам гына. Пашам ышташ жап йӧршын уке. А тыгеже практикым Йошкар-Олан чыла гаяк эмлымверлаштыже эртенам, тушто колледжыште мом пален налмем тичмаш ончыктенам. Черле-влакат таум шуко гана ойленыт, мылам тиде моткоч чот шерге.
Лидия ШАБДАРОВА.
