САМЫРЫК ТУКЫМ

Таҥасымаш: Самырык улыт гынат, мастарлан вуйым огыт пу

29 январь гыч 2 февраль марте Марий Элыште паша профессий-влакын «Самырык профессионал-влак» («WorldSkills Russia») регионысо чемпионатышт эртен. Тушто мастарлыкым вузын, ссузын  120 студентше 15 компетенцийыште (номинацийыште) ончыктен. Ныл номинацийыште школышто тунемше-шамычат таҥасеныт. Нунын пашаштым 169 эксперт терген. 

Тений конкурс поснак неле лийын. Очыни, тиде 2019 ийыште «WorldSkills International» тӱнямбал конкурсын Казаньыште эртаралтмыж дене кылдалтын. Ӱдыр-рвезе-шамычын  мастарлыкыштым тӱткын онченыт, кажне участникын паша вержым тасма дене авыреныт. Тудым вончаш лийын огыл. Тыгай годым жюри штрафым пуэн кертын. Тыгак таҥасымаш жапыште конкурсант дене мутланаш чаралтын. Тидым мый шке шинчам денак ужынам. Но каныме да кечывал жапыште нунын дене мутым вашталташ садак мумо.

Икымше кечын Самырык-влак полатыште чемпионатым торжественно почыныт. А варажым кум кече почела республикысе 8 ссузышто да Марий кугыжаныш университетын площадкыштыже таҥасымаш-влак эртеныт. Тӱҥалтыште ме Йошкар-Оласе сервис технологий-влак колледжышке миен толна. Тушто парикмахер ден модельер-ургызо-шамыч мастарлыкыштым ончыктеныт. Ик залыште ӱдыр-влак ӱпым пӱчкыныт гын, весыште жакетым ургеныт.

Ӱп мастар-влакын пашаштым эсогыл Москва гыч эксперт Е.Шпаковская эскерен. А модельер-влакын тӱҥ экспертышт Н.Бусыгина тиде номинацийым республикысе конкурсыш тений икымше гана пуртымым палемден каласен. Сандене площадкым ямдылаш, кӱлеш оборудованийым налаш шуко жап да вий кӱлын.

— Техникым, манекеным, куэмым, шӱртым, моло арверымат налаш оксам Марий Элын Образований да науко министерствыже да техникумнан администрацийже ойыреныт. Тау нунылан. Вес ийын компьютер полшымо дене пашам ыштыше ургымо машинам налнена.

Конкурсын заданийже неле. Шкежат тудым ыштен онченам. Вигак ойлем, ойырымо жапыште ыштен шукташ пеш йӧсӧ. Мый шуктен омыл. Сандене ӱдыр-влак мый дечем писырак да мастаррак улыт манын ӱшанем, — мане Надежда Юрьевна.

Кумшо кечын медколледжыште, торгово-технологический, строительный техникумлаште уна лийынна. Ончыкылык медик-влак  черлым стационарыште ончат ыле. Мийымына годым Елена Зверева койкышто кийыше черлын температуржым висен, логаржым ончен, уколымат шынден. Тудым эксперт-влак тӱткын эскереныт, а пошкудо кабинетыште конкурсантын пашажым медколледжын тунемшыже-влак экраныште онченыт. Тиде шкешотан видеоурок лийын. Тылеч посна эше ик пӧлемыште ссузыш мийыше вес колледжын студентше-шамычлан кынел кертдыме черлым кузе ончымо дене кылдалтше мастер-класс эртен.

Торгово-технологический колледжыште повар, бармен, отельыште пашам ыштыше-шамыч таҥасеныт. Повар-влак вич шагат жапыште шокшо закускым, «йӱштӧ» кочкышым, десертым ямдылен шуктышаш улыт ыле. Бармен-влак тӱрлӧ коктейльым ыштеныт, а отельысе администратор-шамыч йот эл гыч мийыше уна дене пашам вораҥдарен моштышаш улыт ыле.

Строительный техникумышто кермычым, плиткым оптышо, маляр, сантехник, предприниматель-шамыч мастарлыкыштым ончыктеныт. Кермычым да плиткым  оптышо-шамычын пашаштым Россий кӱкшытан тӱҥ эксперт-влак  И.Храмова ден О.Гладышева  (нуно коктынат тиде колледжыште туныктат) эскереныт да акленыт. Тений кермычым оптышо коклаште икымше гана школышто тунемше-влак (Йошкар-Оласе 7-ше №-ан школ) таҥасеныт. Нунын наставникышт ӱмаште Абу-Даби олаште эртыше «WorldSkills Competition» тӱнямбал конкурсышто Профессионализмлан медальон дене палемдалтше П.Казанцев лийын.

Мылам эн чот плиточник ден кермычым оптышо-шамычын пашаштым ончаш оҥай ыле. Нуно самырык улыт гынат, мастарлан вуйым пуэн огытыл. Тыгай профессионал-влак шкеныштым илышыште муыт, паша вер деч посна огыт код, шоналтышым семынем.

Чемпионатын пытартыш кечынже, кугарнян, Самырык-влак полатыште, кажне номинацийыште сеныше-влакым саламленыт да пӧлекым кучыктеныт. Икымше верым налше-шамыч отборочный чемпионатыш каят. Туштат мемнан ӱдыр-рвезына шкеныштым сайын ончыктат гын, республикнан чапшым Российысе танасымаште Южно-Сахалинскыште августышто аралат.

Сеҥыше-влак:

Повар паша —  К.Нефёдов (торгово-технологический колледж),

Плиткым оптымаш – Д.Черёмин (аграрно-строительный техникум),

Маляр паша – И.Калугина ден П.Алмакаев (строительный техникум),

Парикмахер искусство – К.Иванова (сервис технологий-влак техникум) ден А.Зверева (технологический колледж),

Модын технологийже – К.Исакова (сервис технологий-влак техникум),

Электромонтаж – Д.Петров (транспорт ден энергетике техникум),

Сантехнике ден отоплений – Р.Чамин (строительный техникум),

Медицине ден социальный уход – С.Попова (медицине колледж),

Отельым администрироватлымаш – В.Захаров (торгово-технологический колледж),

Ресторанысе сервис – А.Иванова (торгово-технологический колледж),

Бизнес платформышто  IT-решений – С.Турецкий (МРМТ),

Бизнесыште программный решений – А.Кондратьев (МРМТ),

Предпринимательстве – Н.Камбулов, С.Родимова (предпринимательстве ден индустрий колледж),

Тӱҥалтыш класслаште туныктышо – И.Панова (МарГУ),

Кермычым оптымаш – Г.Бочкарёв (строительный техникум).

Л.ШАБДАРОВА.

М.Скобелевын фотожо.

Опубликовать в Одноклассники

Добавить комментарий