Йошкар-Оласе медицине колледжыште марий здравоохраненийын кумдан чапланыше организаторжо, тазалыкым аралыме министерствым, республикысе медицине организацийым кужу жап вуйлатыше, калык шӱм-чонеш шкеж нерген поро шарнымашым кодышо пагалыме врач-влак лӱмеш стипендийым эн сай 17 студент налеш.
Сертификатым кучыктымо кажне церемонийыште стипендийын озаж нерген радамлын каласкалат. Йошкар-Оласе йоча эмлымверым 35 ий вуйлатыше Л.Соколовалан тений 80 ий темеш ыле. Вич ий ончыч Лелия Ивановна Йошкар-Олан почётан гражданинже лӱмеш стипендийлан шке оксажым ойыраш тӱҥалын. Ӱмаште кумдан палыме да пагалыме врач илыш гыч каен. Тудым шарныме лӱмеш тиде стипендийын учредительже Йошкар-Оласе йоча эмлымвер лийын.
М.ИВАНОВА.
