5-9 февральыште Москва оласе «Экспоцентр» рӱдӧ ончер кумдыкышто «Продэкспо-2018» кочкыш продукт, напитке да нуным ямдылаш кучылтмо сырьё ончер 25-ше гана эрта.
«Продэкспо» Российыште да Эрвел Европышто пеш виян тӱнямбал форумлан шотлалтеш. Тудо продовольствий да напитке сферыште ий еда эртарыме кумдан пагалыме событийже дене чаплана да ынде 25 ий шке элысе кочкыш индустрийым вияҥдыме корным палемда.
Ончер таче, 9 февральыште, пашажым мучашла. Вич кече жапыште тушто 63 эл гыч 2000 утла компаний участвоватлен. 100 тӱжем квадрат метр наре кумдыкышто 31 национальный экспозиций ончыкталтын. Ончерыште Марий Эл гычат икмыняр предприятий лийын, тиде – «Йошкар-Оласе шыл комбинат» ЗАО, «Йошкар-Оласе йӱкшыктарыме комбинат» ООО, «Шернур сыр завод» ЗАО, «Яндар» ООО да «Спраутс Мари» ООО.
«Продэкспо – 2018» ончерын кышкарыштыже эн сай продуктым, кочмо, парфюмерий да косметике продукций ден напиткылан ямдылыме эн сай упаковко ден этикеткым, инновационныйлан шотлалтше продуктым да шуко молым тӱнямбал кӱкшытан конкурсым эртарен палемдат.
М.ИВАНОВА.
