Кодшо рушарнян да арня тӱҥалтыште лум чарныде луммылан, поран чот ӱштмылан кӧра кугорно веле огыл, йолгорнат, кудывечат тӱрыснек гаяк петырненыт. Тидлан кӧра южо вереже эсогыл йолын ошкыл эрташ лийын огыл. Тыгай условийыште моло спецтехнике дене пырля «вашкеполыш» машинат пашам ыштен да пеш кугу нелылыкым шижын. Районласе тора ялыш пурен кертме нерген мутымат лукман огыл, молан манаш гын южо кундемышкыже корным эшеат эрыктат. Тусо калыкым чаманаш гына кодеш, вет корно укелан кӧра черлымат, колышымат ынде издер дене шупшын лукташ логалеш. Но олаштат сӱрет утыжым куандарыше огыл.
– «Вашкеполыш» машиналан кудывечыш кудал пураш моткоч неле: але корно уке, але вес машина чаракым ышта. Шергакан жапым йомдараш огыл манын, доктор-влак, лумеш пижше машина гыч волен, ӱжмӧ верыш йолын ошкылыт. Нунын черлым ончымышт жапыште водитель машинам кольмо, корныеҥ але черлын родо-тукымжо полшымо дене лум гыч луктын кертеш гын, кугу пиал! Такшым, пижше техникым эртен ошкылшо, черлын родо-тукымжо-влак торешланыде лукташ полшат, черланышымат, кӱлеш гын, машина марте нумал луктыт, – каласкала Йошкар-Оласе Вашкеполыш станцийын тӱҥ врачшым алмаштыше Елена Морозова. – Тидымат палемдыде огеш лий: пытартыш кечылаште «вашкеполышым» ӱжмӧ чот ешаралтын. Тидыже тӱҥ шотышто кылмен черланыме, тыгак игече вашталтмылан кӧра вӱргорно давлений кӱзымӧ дене кылдалтын. Теве кызытат станцийыште ик бригадат уке, чыланат медицине полышым ӱжмӧ почеш кудалыныт. Конешне, корно укелан кӧра черле деке шагалже годым жапыштыже миен шуыт…
5 февральыште Марий Эл правительствыште начар игечын экшыкшым кораҥдыме шотышто экстренный совещаний лийын. Тушто регионысо тазалыкым аралыме министр М.Панькова «вашкеполыш» машина-влакын Дубки, Индешымше микрорайон кундемлаште, Водопроводный уремысе частный секторышто лум пленыш логалмышт нерген радамлын каласкален. «Троллейбус транспорт» муниципальный предприятийын лумеш пижше «вашкеполыш» машинам шӱдырен лукташ тягачым яра пуаш тореш лиймыж нергенат чон коржын ойлен.
Луман игече Марий Элым веле огыл, чумыр Российым азапыш пуртен. Тыште ны президент, ны тыглай айдеме, ны правительстве, ны ялозанлык предприятий титакан огытыл, сандене чыла условийыште эн ончычак Айдеме лийман. Тыге веле чыла нелылык куштылгын сеҥалтеш.
М.ИВАНОВА.
