УВЕР ЙОГЫН

Суд деч вара: Эҥгекым ыштымылан – 2 миллион теҥге

2014 ий шыжым ОМОН-ыш пашаш пураш экзамен кучедалмаш деч вара Максим Ядыковын эмлымверыште колымыж нерген возенна ыле. 

Эргыштын ош тӱня дене чеверласымыж деч вара ача ден ава, титакан-влакым рашемдаш да ончыкыжым тыгай ынже лий, пашаш пурымо годым тетла ик рвезат Максимышт семын ынже коло манын, нуным мут кучаш шогалташ шонен, ятыр инстанций гоч эртеныт, ятыр гана суд лийын.

Иктышкыже мыят миенам ыле. Тунам, шарнем, республикысе МВД-н еҥже моткочак умылтараш тыршыш: рвезын колымаште тиде министерствын титакше уке. Кеч чылан гаяк умыленыт: тыге ойлымаш – чын огыл. Санденак Ядыковмыт ешлан моральный эҥгекым ыштымылан тӱҥалтыште Йошкар-Оласе суд МВД-м компенсацийым  тӱлаш пунчалым луктын ыле гынат, вараже садак ты ведомство тӱлышаш огыл манын шӧреныт. Вет министерстве Йошкар-Оласе судын пунчалжым Марий Эл Республикын Верховный судыштыжо обжаловатлен.

Тунам Индырымаш ваштареш комитетын Ядыковмытын интересыштым аралыше юристше-влак эшеат умбакырак каеныт. Нуно Россий Федерацийын Верховный судшын гражданский дела-влак шотышто судебный коллегийышкыже кассационный вуйшиймашым пуэныт. Пиалеш, чын сеҥен. Верховный суд тыге шотлен (рушла кодена): «доводы истцов заслуживают внимания, так как свидетельствуют о существенном нарушении судом апелляционной инстанции норм права, повлиявшим на исход дела, без устранения которых невозможна защита законных интересов заявителей». Тыге Россий Федерацийын Верховный судшын гражданский дела-влак шотышто судебный коллегийже моральный эҥгекым ыштымылан компенсаций шотеш МВД-м Максим Ядыковын ача-аважлан 2 миллион теҥгем тӱлаш пунчалым луктын.


Ушештарена: кум ий утла ончыч, 2014 ийыште, Максим Ядыков Марий Элысе МВД-н ОМОН-ышкыжо пашаш пураш шонен. Тидлан медкомиссийым эртен. Тудын тазалыкшым тышке пашаш пураш келшен толшылан шотленыт да  9 октябрьыште тудлан пытартышлан физподготовко дене экзаменым кучаш гына кодын улмаш. Тидлан рвезе подразделенийыш толын. Но спарринг деч вара рингыште тудлан йӧсӧ лийын да комыш возын. Тунам Максимым эмлымверыш наҥгаеныт. Но 10 октябрьыште самырык рвезын ӱмыржӧ лугыч лийын.

Россий Федерацийын Уголовный кодексшын 109-ше статьяж почеш (шекланен шуктыдымылан кӧра колымашке шуктымаш) уголовный делам 8 тылзе гыч гына тарватеныт. Мо эшеат ӧрыктара: 2016 ий февральыште тудым «преступлений укелан кӧра» манме ой дене петыреныт. Тунам ОМОН-ышто пашам ыштыше ик должностной лицамат эсогыл дисциплинарно мут кучаш шогалтен огытыл. Лач ик темлымашым гына ыштеныт: пашаш пураш шонышо-влакын шкем шижмашышт могай улмым тергаш ынде спарринглашке медицине пашаеҥ-влакым ӱжаш…

Любовь Камалетдинова.

Опубликовать в Одноклассники

Добавить комментарий