2 февральыште Звенигово районысо Какшамарий книгагудын пашаеҥже-влак районысо ветеран-шамыч ушемын президиумжо дене пырля мурызо да поэтессе-влак дене вашлиймашым эртареныт.
Эн ончычак верысе школышто чумыргеныт. Тушто тунемше ден погынышо-влаклан Звенигово районысо ветеран-шамыч ушем председатель Нина Васильева Сталинград кредалмаш нерген каласкален. Тылеч вара поэтессе-влак: Чуваший гыч Раиса Сарби (Раиса Васильевна Бородкина), Звенигово ола гыч Анна Бовт, Йошкар-Ола гыч Зоя Дудина – шкешт нерген кӱчыкын ойленыт да почеламутыштым лудыныт.
Умбакыже чыланат Кугу Отечественный сарын участникше-влаклан памятник деке каеныт. Тушто пеледыш аршашым пыштеныт.
Тылеч вара мероприятий тӱвыра пӧртышкӧ куснен. Уна-влак тыштат почеламутыштым лудыныт. Верысе тӱвыра учрежденийын художественный вуйлатышыже Любовь Орлова, Юлъял клуб вуйлатыше Анатолий Мартьянов да Чуваший гыч мурызо Роза Степанова погынышо-влакым сӧрал мурышт дене куандареныт.
Л.Камалетдинова.
