Тазалыкым арален кодаш, ӱмырым шуяш манын, пайдале да проста кочкышым кочман. «Уто нелытым погаш, кояҥаш – тугеже шоҥгемаш» – манеш ик калыкмут. Айдеме организм гыч шлак ден аярым лукмо ик эн сай йӧнлан пӱжалтме шотлалтеш. Монча уке гын, физический паша полшен кертеш. Мончаште пӱжалтме, кеҥежым мӱкш отарыште мӱйым тулымо паша – пӱртӱсын ӧрыктарыше мунлыкшо! Физический пашам, спорт упражненийым ыштен, мончаш пурен, кече еда огыда пӱжалт гын, капкылыште пӱжвӱд дене лектын кертме наре аяран кислота, шлак тугакак кодыт. Тидым шотыш налдыме айдеме жап деч ончыч черланен, шоҥгемын, пашам ыштен кертдымыш савырнен кертеш.
Тазалыкым настойко денат пеҥгыдемдаш лиеш: 1 кугу совла тыгыдемдыме куатшудо (девясил) (снимкыште) вож ден 1 кугу совла писте мӱй вартышыш 0,7 л йошкар аракам темыман да изи тул ӱмбалне 10 минут шолтыман, йӱкшыктарыман, шӱрыман. Настойкым кочмо деч 20 минут вара 50 мл дене кечеш 2-3 гана йӱман.
М.ИВАНОВА.
