УВЕР ЙОГЫН

Медицине: Илаш да таза лияш чыла йӧн уло

30 январьыште Марий Эллан путырак кӱлешан тӧнежым, Республикысе суд да медицине экспертизе бюрон у корпусшым, почмо. Тудын дене пырля Республикысе клинический эмлымверын патологоанатомический отделенийжымат у верыш кусарыме. Торжественный мероприятийыште Марий Эл правительстве председательын алмаштышыже Илга Дравниеце да регионысо тазалыкым аралыме министр Марина Панькова лийыныт. 

Тиде кечым республикысе медицине пашаеҥ-влак веле огыл, калыкат чот вученыт, молан манаш гын бюрожат, моргшат 50-70-ше ийлаште чоҥымо оралтылаште верланеныт. Тӱжвачынат, кӧргӧ гычынат чот тоштемше пӧрт-влак санитарный да лӱдыкшыдымылык йодмашлан келшен толдымыш савырненыт. Мутлан, патологоанатом-влакын паша верыштышт тувраш волен возын, пырдыж сӱмырлен кертын. Тылеч посна шучко оралте-шамыч нелын черланыме, лишыл еҥым йомдарыме шотышто ойгырышо еҥ-влакын кумылыштым эшеат волтеныт. А ынде…

Медицине тӧнеж-влак 6000 кв.м кумдыкым айлыше ныл пачашан путырак волгыдо да йоҥгыдо оралтыште пашам ышташ тӱҥалыт. У корпусыш гистологий, илыше-влаклан экспертизым ыштыме, суд да биохимий, медицине да криминал, поснак неле экспертизым эртарыме отделений-влакым тичмашнек вераҥдыме. Ритуал залымат палемден кодыде огеш лий. Тыште ынде илыш гыч кайыше-влак дене келшен толшын чеверласаш чыла йӧн уло.

Патологоанатомический отделений шуко еҥлан вес тӱняш кайыше-влак дене пашам ыштыше тӧнеж семын палыме. Чынжым гын тудо илыше-шамычын тазалык дене кылдалтше проблемышт дене шукырак пашам ышта, республикысе чыла медицине организаций гыч кондымо операционно-биопсийный материал-влакым гистологий да цитологий велым шымла. Тазалыкым аралыме министр М.Панькован ушештарымыж почеш, иммуноцитологий манме методике дене пайдаланымылан кӧра республикыштына эсогыл кумшо да нылымше йыжыҥыште улшо авагудо шейке рак дене орланыше 2000 утла ӱдырамашын илышыжым арален коден кертме.

– Цитологий лабораторийыште авагудо шейкысе ракым тӱҥалтыш йыжыҥыште диагностироватлыме скрининг эртаралтеш. Кӱчык жапыште шуко анализым ыштен кертше тыгай программе Юл кундемыштыжат икте веле. Тудын шымлымыж почеш азам ыштен кертше ӱдырамаш-влак кокла гыч 10 процентшын патологий улмым рашемдыме. Мемнан иктешлымашнам шотыш налме, жапыштыже эмлыме дене нунын азам ышташ кӱлшӧ органлаштым арален коден кертме, – кабинетыште верланыше аппарат дене республикын тӱҥ патологоанатомжо Артем Зуев палдарыш .

У пӧртыш кызытсе жаплан келшыше пеш виян ятыр оборудованийым вераҥдыме. Нунын кокла шукышт айдеме факторым тичмашнек кораҥдат, молан манаш гын шымлыме да диагностироватлыме пашам робот-влак шуктат.

– Лабораторийышкына вераҥдыме кызытсе жаплан утларак келшыше да автоматизироватлыме оборудованийлан эсогыл пошкудо регион-влак – Киров область, Чуваш да Татарстан республик-шамыч – кӧранат, – куанжым шылтыде манеш патологоанатомический отделенийын тӱҥ врачше Николай Новоселов. – Тыште кажне гаяк аппарат – шедевр, а у корпуснам россий здравоохраненийыште прецедент семын аклаш шотлан толеш.  

Пытартыш ойжым министр Марина Викторовнат пеҥгыдемдыш. Тудын мутшо почеш, у корпус нерген отчётыш пыштыме фото-влакым Москваште угыч да угыч йодыныт: тыгай кӱчык жапыште тыгай чапле оралтым чоҥен шуктымылан нигузеат ӱшанен кертын огытыл.

…У оралтым 2014 ий майыштак чоҥаш тӱҥалме, но окса ситыдымылан кӧра тиде пашам пел ий гыч чарен шогалтыме. Марий Эл вуйлатыше Александр Евстифеевын Россий Федераций правительствын резерв фондшо гыч 96,6 млн. теҥгем налын кертмыж дене Медведево ПМК-н пашаеҥже-влак тӱҥалме пашам, сай шонымашым мучашке шуктеныт.

– Кызытсе жаплан келшыше да шуэн вашлиялтше оборудований дене шыҥдарыме тыгай чапле условийыште пашам ышташ – кугу пиал. Тидын дене чыладамат уло кумылын саламлем. Тыгак поснак кугу таум строитель-шамычлан ыштем, – Суд да медицине бюрон у корпусшым почмо церемонийым мучашлыш правительстве председательым алмаштыше Илга Дравниеце.

Маргарита Иванова.

 

Опубликовать в Одноклассники

Добавить комментарий