Марий Эл правительствын эше 2010 ий тӱҥалтыштак лукмо «Марий Эл Республикыште йоча, подростко да тунемше ӱдыр-рвезе-влакын канышыштым организоватлыме, тазалыкыштым пеҥгыдемдыме, яра жапыштлан паша верым ситарыме нерген» пунчалже дене келшышын, Курыкмарий районышто калыкым социально обслуживатлыме комплесный рӱдер 2018 ий I кварталлан «Журавушка» социально-реабилитационный рӱдерыште 10 кечаш ныл сменым ямдылен. Тушко неле илыш ситуацийыш логалше 7 гыч 17 ияш марте ӱдыр-рвезе-влак логалын кертыт, тиде – тулык, ача-ава ончен куштымо деч посна кодшо, инвалид, тазалык шотышто экшык улман (корректироватлыше школлаште тунемше), вооружённый да калык кокласе конфликтын, экологий да техногенный катастрофын, пӱртӱс азапын жертвыжлан шотлымо, экстремальный условийыш логалше (пожарыш логалше, беспризорник), виешлымашын жертвыжлан шотлымо, тӱнен илыше еш (шуко шочшан, тичмаш огыл, пашадыме ача-аван) гыч, социально лӱдыкшӧ положенийште улшо, койышышто ситыдымаш палдырныман (ийготыш шудымо-влакын пашашт шотышто подразделенийын учётыштыжо шогышо) икшыве-влак. Икымше смене 22 январьыште тӱҥалын да 31 январьыште пыта, кокымшо 5-14 февральым авалта, кумшо 26 февраль гыч 7 март йотке шуйна, нылымше – 12-21 мартлан логалеш.
«Журавушка» рӱдерыште икшыве-шамычын эҥертыме-коштмо аппаратышт, шӱлымӧ, кочкышым шулыктарыме органышт, шӱм-вургорно системышт дене кылдалтше да моло черыштым эмлат.
Йоча каныш дене кылдалтше чыла йодышым «Курыкмарий районышто калыкым социально обслуживатлыме комплексный рӱдер» кугыжаныш бюджет тӧнежыште (адресше: Марий Эл Республик, Козьмодемьянск ола, Свердлов урем, 9-ше пӧрт) 8 (83632) 7-10-22 телефон дене шуматкече да рушарня деч моло кечын 8 гыч 17 шагат йотке (12-13 шагат – кечывал жап) рашемдаш лиеш.
М.ИВАНОВА.
