УВЕР ЙОГЫН

Вес кундемыш – пашам кычалын

Марий Элыште илыше кажне кумшо еҥ, сай пашам кычалын, вес регионыш куснаш ямде. 2017 ийыште пашам кычалше 32 процент еҥ резюмештыже лачшымак тидым палемден. 

Вес кундемыш куснаш кумылаҥше еҥын тӱҥ амалже – кугу пашадар, илыме вер. Пашам пуышын сымыстарыше социальный пакетым сӧрымыжым, тыгак ешысе кажне еҥлан полшаш темлымыжым шагалын огыл шотыш налыныт.

2017 ийыште Марий Элысе калык утларакше Москваште (17%), Казаньыште (16%) да Санкт-Петербургышто (9%) пашам кычалын. Нылымше верыште – Чебоксар (5%), визымшыште – Нижний Новгород (4%).

Марий Элыште илыше-влак йот эллаштат пашам кычалыныт, поснак Швейцарийыште, Норвегийыште да Австрийыште. Австралий ден США-мат ӧрдыжеш коден огытыл.

Регионыштына пашам вес кундемыште кычалше ола-влак кокла гыч лидерыш Йошкар-Ола лектын. Но Волжск ден Козьмодемьянск ола-влакымат коден каяш шукын ямде улыт.

Марий Эл гыч вес кундемыш могай паша утларак тарватен наҥгая? Калык тӱҥ шотышто «ужалымаш», «карьерым тӱҥалмаш, студент-влак», «производство», «IT, телеком» да «бухгалтерий» профессиональный кумдык-влакым ончен. Кандидат-влак кокла гыч шукынжо англичан йылмым сайын палат, изиш шагалынже немыч, француз да татар йылме-влак дене эрыкын мутланат.

Вес кундемыште пашам утларакше (57%) пӧръеҥ-влак кычалыныт. Пашам кычалше пӧръеҥ ден ӱдырамаш-влакын стажышт – 6 ий деч шуко.

М.ИВАНОВА.

Опубликовать в Одноклассники

Добавить комментарий