УВЕР ЙОГЫН

Тауштат, тыланымаш ден темлымашым ойлат

Марий Элыште Россий Федерацийын Президентышкыже кандидат Владимир Путинын избирательный штабше пашам ышташ тӱҥалын. Тудо тыгай адрес дене верланен: Йошкар-Ола, Панфилов урем, 39-ше номеран пӧрт. 

А кызыт туштак эше общественный приемный эртаралтеш. Приемныйыш еҥ-влак паша кечын 9 гыч 18 шагат марте толын кертыт. Иктым палыман: тургыжландарыше йодыш-влак шотышто тыште юридический консультацийым огыт пу. Тушто Президентыш кандидатлан темлымашым да тыланымашым ойлат.

А тыланымашым ойлаш кумылан еҥ-влак тушко толаш тӱҥалыныт. Нуным волонтер-влак вашлийыт. Тыгак Президентыш кандидат Владимир Путинын ӱшанъеҥже-влак приниматлат. Нунышт мемнан республик деч коктын улыт – тиде Борис Ефремов ден Дмитрий Шипунов. Сайлымаш кампаний жапыште нине ӱшанъеҥ приемым  икмыняр гана эртараш палемдат.

Теҥгече, 22 январьыште, лач нунак приемым эртарышт. Мемнан лиймына годым кок самырык еҥ темлымаш дене толыныт ыле. Иктыже, Игорь, Марий кугыжаныш университетыште тунемеш. Тудо республикыште кадр-влак резервым ышташ кӱлмӧ нерген ойлыш. Весыже, Наталья, Йошкар-Оласе ик организацийыште бухгалтерлан пашам ышта. Самырык-влакын форумыштым эртараш кӱлмӧ шонымашым каласыш.

Дмитрий Шипунов тыге палемдыш:

— Штаб ден приемныят пашам ышташ тӱҥалыныт веле. Сандене еҥ-влак ала-могай кугу йодыш дене огыт тол, а лачшымак кызытсе президентлан,  шуктымо пашажлан тауштат да акым пуат. Еҥ-влакын  темлымашыштым иктеш чумырен, ончыкыжым чылажат президентыш кандидат марте намиен шукталтеш.

Ончыкыжым тыгак Россий Президентыш кандидат Павел Грудининынат избирательный штабше почылтшаш.

Любовь Камалетдинова.

Опубликовать в Одноклассники

Добавить комментарий