ЭКОНОМИКЕ

Социальный илыш: Мо шергештын, мо шулдештын?

2017 ий декабрь мучаште Марий Элыште кочкыш сату наборын акше кокла шот дене 3423,13 теҥгеш шуын да ик тылзе жапыште 0,4 процентлан кӱзен. 

Емыж-саска, пакчасаска кокла гыч свежа кияр 31 процентлан шергештын, помидор – 18,9 процентлан, виноград – 8,7 процентлан, банан – 5,6 процентлан, пӱкш – 2,2 процентлан, грушо – 1,5 процентлан да коштымо емыж-саска – 1,4 процентлан. Тыгодымак апельсин 8,2 процентлан шулдештын, чеснок – 5,9 процентлан, йошкарушмен – 2,5 процентлан.

Моло кочкыш сату коклаште томатан консерве 2,5 процентлан шергештын, натуральный кофе ден шолтымо колбаса – 2,4 процентлан, калаче сынан изделий – 2,0 процентлан, кушкыл ӱй – 1,8 процентлан.

Эн чот сакырложаш шулдештын – 5,1 процентлан, кол кочкыш кокла гыч шинчалтыме сельдь – 3,9 процентлан, чонан да йӱкшыктарыме кол – 3,3 процентлан, шинчалтыме да шикшеш кӱктымӧ колан деликатес кочкыш – 3,0 процентлан, кылмыктыме тичмаш кол – 2,0 процентлан. Тыгодымак лосось тӱшкаш пурышо шкенан элысе кол мӧртньӧ 3,7 процентлан шергештын, лосось тӱшкаш пурышо эрыктыме кол – 2,5 процентлан, кол консерве – 1,8 процентлан.

Шӱраш кокла гыч утларакше тичмаш шемшыдаҥ, пурса да немычпурса шулдештыныт – 2,3 процентлан, шӱльӧ да шож шӱраш – 0,7 процентлан. Тыгодымак тар шӱраш 1,0 процентлан шергештын, манный шӱраш – 0,8 процентлан.

Кочкыш сату кокла гыч эше кетчуп 3,0 процентлан шулдештын, емыж-саска сок ден ош арака – 2,3 процентлан, йӱкшыктарыме да кылмыктыме чыве – 1,8 процентлан, сӧсна шыл – 1,5 процентлан, шӧр продукт – 1,1 процентлан.

М.ИВАНОВА.

Опубликовать в Одноклассники

Добавить комментарий