Марий Турек районышто «Порылыкым пид» поро кумыл акций У ий деч ончычак тӱҥалын да тений 8 январьыште мучашлалтын.
Акцийын участникше-влак – Марий Турек посёлкысо школышто тунемше ден нунын ача-авашт, «Ромашка» йочасадын воспитанникше, райрӱдыштӧ илыше поро кумылан еҥ-шамыч – шке кид дене пидме 45 носким, тыгак тӱрлӧ пӧлекым чумыреныт да нуным йытыра пакетыш вераҥденыт. А 8 январьыште волонтёр-влак Марий Турекысе ветеран пӧртыш шкет да илалше еҥ-шамычым Рошто пайрем дене саламлаш миеныт да кажныжлан тӱшкан ямдылыме пӧлекым кучыктеныт.
Шокшо да пайдале пӧлек чыла ветеранлан келшен, шке кид дене ямдылыме «Палыдыме коча-кова-влаклан» манын возыман сылне открыткат кажнын кумылжым налын.
М.ИВАНОВА.
