29 январь гыч 2 февраль марте Марий Элыште паша профессий-шамычын «Самырык профессионал-влак» («WorldSkills Russia») регионысо чемпионатышт эрта. Таҥасымаш-влак ссузлаште да Марий кугыжаныш университетыште лийыт. Чемпионатыш 14 ияш гыч 22 ияш марте 119 ӱдыр-рвезе ушна.
Техникум ден колледжлаште тунемше-влак мастарлыкыштым вич компетенцийыште (номинацийыште) ончыктат: плиткым оптымаш, сантехнике ден отоплений, кермычым оптымаш, предпринимательстве, электромонтаж, модын технологийже, парикмахер искусство, повар паша, ресторан сервис, тӱҥалтыш класслаште туныктымаш, молат. 14-16 ияш-шамыч «WorldSkills Junior» конкурсышто ныл номинацийыште таҥасат. Тений чемпионатыште мастарлыкым ссузышто тунемше деч посна вузын студентше ден школлаште тунемше-шамычат ончыктат.
Чемпионат кышкарыште «Региональный экономикым кадр дене пойдарымаш» пленарный заседаний, «Самырык профессионал-влак» толкынын воспитатлыме вийже: проблемыже, ончыкылыкшо», «Чоҥымо отрасльште кадрым ситарымаш: проблеме да нелылык гыч лекме корно» «йыргешке ӱстел-влак», «Самырык профессионал-влак» чемпионатын профориентационный пашаште полышым пуымаш» семинар лийыт. Тыгак «IТ дене — ончыкылыкыш» студент форум, тӱрлӧ ӱчашыме да мутланыме площадке, мастер-класс-влак пашам ышташ тӱҥалыт.
Сеҥыше-шамычым Йошкар-Оласе Самырык-влак полатыште 2 февральыште палемдат. Призёр-влак республикнан чапшым августышто Южно-Сахалинскыште Российысе танасымаште аралат.
Л.ШАБДАРОВА.
