Шернур район Шӱдымарий школышто лийме годым ятыр оҥай туныктышо дене палыме лийынна. Нунын кокла гыч иктыже — Инна Евгеньевна Ефимова. Тудо марий йылме ден литературым туныкта, тыгак школ директорын туныктымо паша шотышто алмаштышыжын сомылжым шукта.
— Мый ты кундемыштак Изи Памаш ялыште шочын-кушкынам. 9-ше класс марте шочмо школыштемак тунемынам, варажым Марисола школыш коштынам. Марий пединститутым тунем пытарымеке, шочмо школышкемак пашам ышташ толынам. Вигак огыл, но шинчымашым налме шепкам шкеж деке мыйым эре ӱжын, — мане И.Ефимова.
— Вузым йӧсӧ пагытыште тунем пытаренда. Тунам туныктышылан паша верым муаш моткоч неле лийын. Тиде нелылык гыч кузе лектында?
— Шуко жап кевытчылан пашам ыштенам, молан манаш гын школыш опыт деч посна налын огытыл. Пиалешем, Марисола школышто марий йылмым туныктышын верже лектын. Мыйым тушко тунамсе директор Анатолий Алексеевич Васильев ӱжын. Тыге туныктышо лияш шонымашем шукталтын, вет изинек ты профессий мылам лишыл лийын, школыштат сайын тунемынам, эсогыл тунемме жапыште туныктышо-шамычымат алмаштенам. Тукым акам Валентина Сергеевна Михееват туныктышо. Тудат мыйым ты профессийым ойырен налаш шӱкалтышым ыштен.
-Школ коридор дене эртыме годым класс-влакым ончал савырнышым. Коеш, йоча-влак шукынак огытыл. Кызыт ятыр школышто тыгай шӱлык сӱретым ужаш лиеш. А тендан чоным тиде тургыжландара?
— Тений 46 тунемшына уло. Икымше классыш кумытын гына толыныт. Мутат уке, чонем коржеш, вет шке жапыштыже школыштына 100 утла икшыве тунемын. Тыгеже 1 сентябрьыште икымше классыш утларак ӱдыр-рвезе толеш манын шоненна, молан манаш гын йочасадыш шукырак коштын, толын тынар веле. Амалже теве кушто: тенийсе пагытыште ача-ава-влак икшывыштым ялысе йочасадыш коштыктат, молан манаш гын олаште вер уке, а теве тунемашыже оласе школыш колтат.
— Икмыняр сомылым шуктеда, туныктышат, школ вуйлатышын алмаштышыжат улыда. Тидын годым ешыштат сай пелаш, ава лийман. Чыла шукташ вийым кушто муыда?
— Пашам йоратем, сандене нойымым чотшак ом шиж. Мылам йоча-шамыч вийым пуат, мыят нунылан чон шокшем пӧлеклем.Тунемшем-влаклан кӧра творческий шӱлышем ешаралт толеш, тӱрлӧ конкурсыш ушнаш кумылем лектеш. Ончылий «Идалыкын туныктышыжо» конкурсышто вием тергенам. Районышто сеҥышыш лектынам, а республикыште призерыш логалын омыл гынат, вес туныктышо-влакын моштымашыштым ужын шуаралтынам. Нунын опытыштым пашаштем кучылтам.
Кызыт марий йылме ден литературым гына огыл, руш йылме ден литературым, информатикымат туныктем. Но вуйым ом шупш, вет тиде чон йодмо сомыл. А шке икшывем-влак тиде школыштак тунемыт. Иктыже 2-шо классыш коштеш гын, весыже — индешымшыш. Кугуракше моткоч полша: сурт сомылкаште ма шольыжым ончымаште ма. Тудо мыйын кугу эҥертышем.
Кумданрак — «Марий Эл» газетын
2018 ий 23 январьыште лекше номерыштыже лудын кертыда.
Лидия ШАБДАРОВА.
М.Скобелевын фотожо
