САМЫРЫК ТУКЫМ

Воктенет – самырык еҥ: «Пӱйым пурын чытенам»

Тачысе лаштыкнан унаже Евгений Милютин дене мый Йошкар-Оласе Самырык-влак полатыште палыме лийынам. Тудлан ты кечын Марий Эл вуйлатышын стипендиатше лийме нерген сертификатым кучыктеныт ыле. 

— Женя, тый уста куштызо улат. Молан илышет лач ты профессий дене кылденат?

— Мый Кужэҥер район Рушплак ялыште шочынам. Шорсола школышто тунемынам. Куштызо лияш районысо клубышкына Шкетан лӱмеш национальный драме театрын артистше-влак мийымышт таратен, очыни. Сценыште нунын модмыштым ончен, артист лияш кумылем шочын. Тыге корнем тӱвыра да сымыктыш колледжыш такыртенам. Хореографий пӧлкаш логалам манын ӱшанем шагал лийын, молан манаш гын оласе йоча-влак тӱрлӧ искусство школыш коштыныт, а мемнан ялыште тыгай нерген шонаш веле кодын. Но пиалем уло улмаш, мыйым Валентина Михайловна Окулован классышкыже налыныт.

Южгунам кечыште шым мужырат лийын. Кандаш шагат кас марте тунемынна. Неле ыле, шукын чытен огытыл, документыштым налын, колледжым кудалтен каеныт. Мый пӱйым пурын чытенам. Кокымшо курсышто Ленин лӱмеш тӱвыра полатыште пашам ыштыше «Улыбка» ден «Ассорти» ансамбльлаш Жанна Витальевна Шутылёва ӱжын. Лач тушко коштмем мыйым утларак шуарен, профессионалыш савырен. Нине ансамбльлашке ом кошт гын, кызытсе кӱкшытыш ом шу ыле.

— Очыни, тиде сомылым коден каяш шонымашат вуйыштет пӧрдын?

— Тыгаят лийын. Эсогыл колледжыште тунемме да кок ансамбльыште иканаште куштымо годым лу шагат кас марте йол ӱмбалне лияш логалын. Тазалыкат начаремын, сандене «Улыбка» ден «Ассортиш» ик жаплан коштмым чарненам. Варажым тунемалтын. Нунын дене пырля Сочишке Олимпиадыш, Москвашке Российысе конкурсыш миенам. Тушто сольный номер дене кок икымше верым налынам.

Кумданрак — «Марий Эл» газетын
2018 ий 23 январьыште лекше номерыштыже лудын кертыда.

Лидия ШАБДАРОВА.

Опубликовать в Одноклассники

Добавить комментарий