Марий Элыште икымше йочалан выплатым налын кертше-влаклан доходын суммыжым палемдыме. Выплатылан йодмашым ик айдемылан шотлымаште 15 тӱжем теҥге деч шуко огыл доходым налше еш-влак пуэн кертыт.
Тылзе еда тӱлыман выплате 2018 ий 1 январь деч вара шочшо йочалан палемдалтеш, тыгодым тудо Россий Федерацийын гражданинже лийшаш, ешыште ик айдемылан шотлымаште доход 2017 ий II кварталыште пашам ыштен кертше гражданинлан илен лекташ лийме 1,5 кугыт деч шуко погынышаш огыл.
2017 ий II кварталыште Марий Элыште пашам ыштен кертше гражданинын илен лекташ лийме кугытшо 10047 теҥге лийын. Тидын дене келшышын, 2018 ийыште икымше йочалан выплатым ик айдемылан шотлымаште 15070,5 теҥге (10047х1,5=15070,5) деч шагал доходан еш-влак налаш тӱҥалыт.
Ик айдемын доходшым шотлымо годым йодмашым пуымо деч ончычсо 12 тылзе жапысе тичмаш (налог деч посна) пашадар, пенсий, пособий, стипендий да моло окса доход шотыш налалтыт. Ик айдемын доходшым рашемдыме годым ешын составышкыже ийготыш шудымо йоча-шамыч, нунын ача-авашт да коча-ковашт пурталтыт.
2018 ийыште тылзе еда тӱлымӧ выплате 2017 ий II кварталыште йочан илен лекташ лийме кугытшо наре лиеш. Тиде – 9645 теҥге.
Йодмаш дене йочан шочмыж деч вара пел ий эртымеке веле толмо огыл гын, выплате икшывын шочмо кечыж гычак тӱлалтеш, моло случайыште – выплатылан йодмашым пуымо кече гыч. Выплате ик ийлан палемдалтеш, тылеч вара угыч погымо документ комплект негызеш эше пел ий (икшывын 1,5 ияш лиймешкыже) ойыралтен.
Кызыт социально полшымо у мера-влакым пуымо порядке ден йӧным рашемдыме шотышто нормативно-правовой акт-влак ямдылалтыт.
М.ИВАНОВА.
