26 декабрьыште Марий Эл Республикын кудымшо созыв Кугыжаныш Погынжын 34-ше сессийже лиеш.
Тушто 11 йодышым ончаш палемдалтеш. Депутат-влак республикын 2017 ийлан бюджетышкыже пытартыш вашталтыш-влакым пуртат, референдумым эртарыме, депутат пашам, кугыжаныш да муниципал службым регулироватлыме йодыш-влакым ончат. Тыгак тулык да ача-аван полышышт деч посна кодшо йоча-влакым ешыш ашнаш налмылан оксам шукырак тӱлышаш нерген законопроектым, Параньга районышто у илемым ыштыме, Кугыжаныш Погынын 2018 ийлан паша программыжым, икмыняр моло йодышым каҥашат.
Л.Камалетдинова.
