Марий Эл Республикым вуйлатыше Александр Евстифеев Регионышто правопорядкым кучымо шотышто координационный совещанийын заседанийжым эртарен.
Тушто кугыжаныш да верласе кучем орган-влакын йот, тыгак гражданство деч посна кодшо граждан-влакын закондымын куснылмыштым да пашам ыштымыштым рашемдыме, налог шотышто правам пудыртышо-влакым контрольышто кучышо, эскерыше орган-влакын пашаштым саемдыме йодыш-влакым лончыленыт.
Совещанийште палемдыме: тений 11 тылзе жапыште Марий Элын миграционный учётышкыжо 11362 йот гражданиным шогалтыме, тидыже кодшо ий тыгаяк жап деч 17,5 процентлан шуко. Тыгодымак республик гыч кайыше-влак 20 процентлан ешаралтыныт.
Йот граждан-шамыч Марий Элыш тӱҥ шотышто Узбекистан (23%), Таджикистан (13,9%), Украина (7,8) да Азербайджан (6,9%) гыч толыт. Мӱндыр йот эл шотышто Индийым, Туркменистаным да Германийым палемдыман. Марий Элыш толшо йот граждан-влак шукынжо (89%) Йошкар-Оласе, Волжск оласе да Медведево районысо миграционный учётыш шогалыт. Таче республикыштына 4215 йот граждан ила.
Совещанийын участникше-влак Марий Элын вузлаштыже шинчымашым погышо 2500 наре йот студентым эскерыме шотыштат мутланеныт. «Регионышто порядке лийже манын, полиций йот эл гыч толшо кажне студентым уто нелылык деч посна муын кертшаш. Вуз-влакат порядкым эскерыме пашашке ушнышаш улыт », – манын А.Евстифеев.
М.ИВАНОВА ямдылен.
