Марий Эл правительстве председательын алмаштышыже Юрий Сидыганов Кужэҥер ден Шернур районлаште пашаче совещанийым эртарен.
Тушто республикын ялозанлык да продовольствий министрже Александр Гречихо, ветеринарий комитет председательын пашажым шуктышо Сергей Колыженков, «Кужэҥер муниципал район» муниципал образований администраций вуйлатыше Сергей Михеев, «Шернур муниципал район» муниципал образований администраций вуйлатышын икымше алмаштышыже Александр Кугергин, ял шотан илем, организаций, озанлык вуйлатыше, моло лийыныт, палдара Марий Эл вуйлатышын мер кыл да увер управленийже.
Совещанийыште ялозанлыкым вияҥдыме кугыжаныш программым кузе шуктымым иктешленыт да 2018 ийыште отрасльым умбакыже вияҥдышаш планым ончен лектыныт.
Мландым собственностьыш (арендыш) пуымо дене кылдалтше нелылык-влак нерген поснак радамлын мутланеныт.
Тыгак республикыш африканский чуман вирусшым кондымо деч профилактикым ышташ, тиде черын лӱдыкшӧ улмыж нерген еҥ-влаклан каласкаш да ветеринар службын йодмашыжым шукташ кӱлмӧ нерген каҥашеныт.
Шернур районышто лиймышт годым «Лукоз» предприятийын вуйлатышыже Иван Уразаевын темлыме ойжо шукыштлан келшен. Тудо ялозанлык сатум ыштен налше-влаклан чапле качестван гранулироватлыме чоштыра кургым ямдылыме шотышто услугым пуэн кертме нерген ойлен.
Совещаний-влак республикысе районлаште умбакыже шуйнат.
Л.Камалетдинова.
