Республикысе клинический эмлымверыште фасеточный йыжыҥын радиочастотный денервацийже у аппарат дене икымше гана кӱкшӧ технологичный операцийым ыштыме. Эмлыме тиде йӧн тупрӱдыштӧ чыташ лийдымын корштымым эн сайын лыпландара.
– Утыждене кылмымылан, физический нагрузкылан, спорт дене йоҥылыш заниматлымылан, кенета савырнымылан але пӱгырнымылан кӧра айдемын тупрӱдыжӧ чыташ лийдымын коршташ тӱҥалын кертеш, – каласкала эмлымверын нейрохирургический отделенийжым вуйлатыше, Марий Эл Республикын Тазалыкым аралыме министерствыжын тӱҥ внештатный нейрохирургшо С.Трифонов. – Ситыдымашым медикамент, физиопроцедур, гимнастике дене эмлат гынат, корштымо ок эрте. Южгунам корштымо утыжденат шуйна, хроническийыш савырна да икмыняр тылзе почела нимо денат ок лыплане. Тидыже тупрӱдысӧ тыгыде фасеточный йыжыҥ-влакын могай улмышт дене чак кылдалтын. Чарныде корштымым чытен, айдеме ноя, врачын темлымыж почеш эмлалтме тӱрлӧ йӧн дене пайдаланен онча, но нимо шотым ок му. Невролог пациентым нейрохирургын консультацийышкыже колта, да тудыжо фасеточный йыжыҥын радиочастотный денервацийже шотышто операцийын кӱлешлыкшым рашемда. Тиде чарныде корштымым сайын эмлыше шуко йӧн гыч – иктыже. Радиочастотный денервацийын вийже корштымым лыпландарыме але йӧршын чарыме дене кылдалтын. Тидыже операций деч вара вигак але 1-1,5 тылзе гыч палдырна. Мо-гынат, процедурын вийжым операций деч вара куд арня эртымек веле аклаш шотлан толеш.
М.ИВАНОВА.
