КУЛЬТУР ДА ИСКУССТВО ТЕАТР

У спектакль: «В овраге» — сцене кӱкшытыштӧ

30 ноябрьыште Йоча да самырык-влаклан театр-рӱдерыште А.Чеховын «В овраге» пьесыж почеш руш йылме дене шындыме тыгаяк лӱман спектакльын премьерже лие.  

Постановкым сценыш лукташ Россий тӱвыра министерствын самырык режиссёрлан полшышо конкурсышто грантым Эрвина Гордееван сеҥен налмыже полшен. Повесть негызеш спектакльым шындаш сценарийым режиссёр-постановщик Эрвина Гордеева шкежак возен.

Спектакль тӱҥалмеке, ойыртемалтше сцене шинчалан вик перна. Художник Алексей Голубцев ты гана тудым икмыняр ужашлан пуйто «шелын». Ял илыш сценыште ончыл планыште кая, а коремыште мо ышталме шеҥгелне, кӱшнӧ ончыкталтеш. Семым композитор Марий Эл искусствын заслуженный деятельже Вениамин Захаров келыштарен.

Тӱжвач ончымаште «В овраге» спектакльыште тыглай еҥ-влакын илышышт почылтеш. Поян купеч Цыбукин (Андрей Васильев) да тудын ватыже Варвара (Наталья Михайлова) койыш-шоктыш, илыш умылымаш дене моло поян тӱшка дечын нимо денат огыт ойыртемалт. А нунын кугурак эргышт Анисим (Алексей Голубцев) полицийыште служитла, тыгодымак шоя оксам таптыше мошенник улмаш. Цыбукинын изирак эргыже Степан (Александр Кожевников) — илышым шот дене чоҥаш пеш начар койыш-шоктышан, пушкыдо айдеме, адакшым соҥгыра. А Аксинья  шешкышт (Татьяна Окунева) шкенжын нерген веле шона да Цыбукинмытын поянлыкыштым погалтен налаш вашка. А Липа (Ольга Федотова) — суртозан кокымшо шешкыже — йӧршын вестӱрлӧ. Тудо  спектакльыште ончыктымо чумыр тӱня дечат ойыртемалтеш. Тудо Юмылан ӱшанымыж дене веле огыл, эн ондак пиалан ончыкылыклан ӱшанымыж дене ойыртемалтеш. Липа шона: тӱняште яндар чон дене илаш гын, икте-весым, чынжымак, йӧраташ гын, айдемын илышыже волгыдо, мотор лиеш. Артист-влак образыштым келгын, мастарын почын пуэныт.

Спектакль келге умылымашан. Сценарист, режиссёр-постановщик Эрвина Гордеева спектакль деч варат мемнам шонаш, герой-влак верчын, поснак Липа верчын, вургыжаш тарата. Тиде спектакль формыж денат, руш классикын произведенийжым сцене гоч почын ончыктымо йӧн денат ойыртемалтеш. Сандене спектакль нерген радамын каласкален лекташ, ала-могай иктешлымашым ышташ, тудлан акым пуаш ӧрмашан веле. Тудым шке ужаш, тӱҥалтыш гыч мучаш марте шке шинча дене ончен лекташ кӱлеш.

Кумданрак — «Марий Эл» газетын
2017 ий 2 декабрьыште лекше номерыштыже лудын кертыда.

 

Алевтина Байкова.
(Фотом театр-рӱдерын архивше гыч налме.)

Опубликовать в Одноклассники

Добавить комментарий