Шуматкечын Йошкар-Олаште мер тӱҥалтышым сайлан шотлымо республиканский у Толкынын организационный форумжо лийын. Тушко калыкын шонымашыжым мер толкын да республикысе лӱмлӧ еҥ-влак гоч кӱшыл кучем деке намиен шуктышо инициативный группо чумырген.
Погынышо-влак Толкынын цельже ден задачыжым палемденыт. У мер организацийын тӱҥ шонымашыже – кучем ден обществын вашкылыштым тӱшка инициативым поддержатлыме гоч ышташ, калык дене вашлиймашым эртараш, проект-влакым ямдылаш да нуным кучем марте намиен шукташ. Проект-влакын авторыштлан юридический да моло сынан кӱлеш полышым пуаш, тиде мер пашашке республикыште илыше тӱрлӧ калыкын да тӱрлӧ ийготан еҥ-влакым ушаш палемденыт.
Толкынын координаторжо-влак теве кӧ улыт:
— Валентина Злобина, Марий Эл Кугыжаныш Погын председательын ончычсо алмаштышыже, Марий Эл вуйлатышым сайлымаште «Партия пенсионеров» деч баллотироватлалтше;
— Михаил Матвеев, «Марий национальный конгресс» мер организаций вуйлатыше;
— Лариса Лоскутова, Самырык-влакын полатышытын молодежный инициативым вияҥдыме рӱдержын вуйлатышыже.
Форумышто йоча да самырык-влакын пашашт, тачысе илышлан келшен толшо ола кумдыкым тӱзатыме, тазалык шотышто тӱнен илыше-влакын нелылыкышт, икмыняр моло нерген ойленыт.
Толкынын погынымаштыже Марий Эл вуйлатыше Александр Евстифеев лийын. Тудо мер инициативын кӱлешлыкшым палемден да сай лектыш дене пашам ыштымылан ӱшанжым каласен.
Форумын участникше-влак пытартышлан резолюцийым луктыныт.
Л.Камалетдинова.