Рӱдола на 11.03.
Рӱдола: таче да эрла
Марий Элын Арбитраж судшо «Троллейбус транспорт» муниципал предприятийым панкрутыш лукмо йодышым ончымым вес жапыш кусарен. Ынде тиде йодышым 7 апрельыште лийшаш заседанийыште ончаш палемдыме. Мут толмашеш, тиде йодышым ончымо кечым нылымше гана кусареныт.
Муниципал предприятийым панкрутыш лукташ Федеральный налог службын Марий Эл Республикысе управленийже темлен. Налоговик-влак троллейбус предприятийын пеш шуко парымже погынымым ончыктыман йодмашым Арбитражный судыш кокымшо гана колтеныт. Троллейбусник-влакын Пенсий ден Обязательный медицине страхований фонд-шамычлан гына парымже 100 миллион теҥгешке погынен. Февральыште налог службын еҥже-влак вес цифрым, 62,8 миллион теҥге парымым, ончыктыман йодмашым возеныт.
Троллейбус транспорт предприятийын энергетик-влакланат парымже кугу. Март тӱҥалтыште тудын ужашыжым тӱлен. Кызыт энергоресурсым пуышо-влаклан 64 миллион теҥге парымже кодын.
«Троллейбус транспорт» муниципал предприятийым панкрутыш лукташ йодмашым Арбитражный суд 12 декабрьыште налын. Ончычшо тиде йодышым 17 январьыште, вара 17 февральыште да 7 мартыште ончаш палемденыт ыле.
Корным аралыде огеш лий
Вӱдшор жапыште автомобиль корным локтылалтме деч аралаш манын, 31 март йотке Йошкар-Оласе Анников уремын 10-шо №-ан пӧртшӧ деч тӱҥалын, Фестивальный урем марте ужашыже, Бауман уремын Машиностроитель ден Шумелев урем коклаже чыла тӱрлӧ транспортлан петырыме лиеш. Автомобилист-влак тидым шотыш налыт да палемдыме жапыште Й.Кырля, Садовый да Шумелёв урем дене кудалышташ тӱҥалыт манын, ӱшанена.
Тыгак республикын рӱдолаштыже автомомбиль корным шошым арален кодаш да тудым лӱдыкшыдымым ышташ манын, олан мэржын кӱштымашыж дене 7 апрель гыч 6 май марте ораван трактор ден кажне осьшылан шотлымаште 4 гыч 6 тонн деч утларак нелытан автомашина-влаклан кудалышташ чаралтеш. Шошо жаплан тыгай чарымаш годым международный сатум, автобус дене пассажирым, кочкыш сатум, вольыкым, эмым, ӱйлыме да йӱлатыме матеиралым (ГСМ-ым), урлыкаш пырче фондым, удобренийым, вольыклан кормам, почто грузым шупшыктышо, автомобиль корным сайым кучымо пашам шуктышо специализироватлалтше предприятий-влакын транспортышт, чрезвычайный ситуаций годым да пӱртӱс туткарын кышажым кораҥдаш кӱлшӧ грузым, пеҥгыде быт шӱкшакым полигоныш шупшыктышо да РФ-н Обороно министерствыжын транспортшо веле кудалышт кертыт. Тиде пагытыште муниципал автомобиль корным чот эскераш тӱҥалыт. Чыла вере кошташ чарыше корно знак-влак вераҥдыме лийыт.
Йошкар-Олаште — «Самырык-влак толкын-2017»
Эстраде мурым мурышо-влакын «Самырык-влак толкын-2017» всероссийский фестиваль-конкурсышт тений 11-12 мартыште Сеҥымшын XXX идалыкше лӱмеш культур полатыште лиеш.
Ӱшаныме шуэш: тудо олан музыкальный илышыштыже ик эн чапле событий семын шарнаш кодеш. Фестиваль-конкурс регион ден калык-влак кокласе, творческий кылым вияҥдаш, икте-весым шке опыт дене палдараш, творчестве коллектив, исполнитель-влакым тургыжландарыше йодыш дене кугыжаныш, мер пашаеҥ-влакым палдараш, ӱшаным пуышо самырык, талантан мурызо влаклан вияҥашышт полшышаш.
«Эстраде муро» номинацийыште, ийготым шотыш налын, солист-влак вич, а вокальный ансамбль-влак кум тӱшкалан шелалтын мастарлыкыштым ончыкташ тӱҥалыт.
11 мартыште, фестиваль почылтмо кечын, вуйлатыше-влаклан йыргешке ӱстел да конкурсант-влакым колыштмаш лиеш. А 12 мартыште 15 шагатлан -гала- концерт деч вара сеҥыше-влакым палемдат.
Фестиваль конкурс кышкарыштак вуйлатыше-влаклан мастер-класс эртаралтеш. Ӱмаште «Самырык-влак толкын» фестиваль конкурсыш 150 утла мурызо ушнен ыле.
Е.Садовин.
