КУЧЕМ УВЕР

Сессий: Шушаш ийын окса сита?

30 ноябрьыште Марий Эл Республикын кудымшо созыв Кугыжаныш Погынжын 33-шо бюджет сессийже эртыш. 

Тушто депутат-влак чылаже 31 йодышым ончышт. Тӱҥ йодыш Марий Эл Республикын 2018 ийлан да 2019 ден 2020 ийла плановый жаплан республиканский бюджетше нерген да «Марий Эл Республикын 2017 ийлан да плановый 2018 ден 2019 ийлан республиканский бюджет» законыш вашталтышым пуртымаш»  законын проектшым каҥашымаш ыле.

Марий Эл Республикын шушаш 2018 ийлан сессийыште приниматлыме бюджетын ойыртемже нерген бюджет шотышто комитет председательын алмаштышыже Е.Вахитова тыге палемдыш:

— Вес ийынат бюджет социальный улмыжым арален кода. Тӱҥ статья-влак – тиде тазалыкым аралымаш, образований, социальный сфере, илыме вер да коммунал озанлык. Доход ужашыште республикысе газ сеть деч  парыш лийшаш. Бюджетым ончымо годым Кугыжаныш Погынын комитетше-влак кугу чолгалыкым ончыктеныт да, мутлан, тазалыкым аралымашым, медициным, социальный сферым саемдыме шотышто ятыр темлымашым ыштеныт. Икмыняржым таче приниматлыме бюджетыштак шотыш налме. Молыжым 2018 ийын итогшо дене келшышын ончат.

 

Ик эн тӱҥжӧ — тудо дефицитдыме лиеш. Бюджет дене келшышын приниматлыме доход ден роскотын  кугытышт кокла шот дене — 25 миллиард теҥге. Тиде суммо гыч 10 миллиардше – федеральный бюджет гыч пурышо пӧртылтыде кучылташ лийше окса. А тылеч ончыч бюджет проектыште вес цифр ыле – доход ден роскот 23 миллиард теҥге, федеральный бюджет гыч 8 миллиард тенге лийын. Но кокымшо колыштмашлан тудо вашталтын.  

Марий Эл вуйлатыше Александр Евстифеев у правительствын икмыняр членжын кандидатуржым, чылаже 11 еҥым, да Марий Эл Республикын Кугыжаныш счетный палатыжын председательжым согласоватлаш темлыш. Кажныж дене депутат-влак ик йӱк дене келшышт.

Сессийыште Марий Эл Республикын обязательный медицине страхований территориальный фондшын 2018 ийлан да 2019-2020 ийласе плановый жаплан бюджетше, тушко, тыгак сайлымаш, ялозанлыклан кугыжаныш полыш, инвестиций, административный правонарушений, еҥ-влаклан юридический полышым яра пуымо шотышто, моло законышкат вашталтышым пуртымо нерген  каҥашышт.

 

Любовь Камалетдинова.

Опубликовать в Одноклассники

Добавить комментарий