КУЛЬТУР ДА ИСКУССТВО

Моторлык конкурс: «Морко ӱдыр – чевер шӱдыр»

Морко тӱвыра полатыште Аван кечыж вашеш марий ӱдырын моторлыкшым да усталыкшым аклыме район кӱкшытан кумшо конкурс эртыш. 

Морко ӱдыр – могай тудо? Чолга, поро, пашаче, койышан, мотор… Уке, тиде яра мут огыл, тиде аклыме йӧнын икмыняр велже.

«Морко ӱдыр – чолга ӱдыр». Тидым ончыктышашлан шке да еш, илышыште могай ошкылым ыштыме дене мут да видео гоч, сылне марий сем почеш оҥайын палдараш кӱлын. Латкок ӱдыр. Кажныже мо дене гынат ойыртемалтын. Но Коркатово лицейын кадет классше гыч Екатерина Кошкина моло деч чолгарак улмыжым ончыктыш. Тудо сайын тунемеш веле огыл, лицейыште тӱрлӧ пайремым вӱда, волонтёр пашаш ушна, муро студийыш коштеш, конкурслаште вийжым терга.

«Морко ӱдыр – поро ӱдыр». Аван кечыж вашеш авалан могай пӧлекым ышташ лиеш? Поро деч поро мутым ойлаш, почеламут дене чоным почаш, пеледышым кучыкташ… Но тидым еҥ ончылно да эше сценыште аван шинчашкыже ончен ышташ… кумылет тодылалтеш, йылмет тӱкна. Но Шлань гыч Кристина Веденеева, Марий радиомеханический техникумын студенткыже, МарГУ-н «Марий мурсем» ансамбльышкыже коштеш, шкенжым сценыште кучаш тунемын. Садланак аважлан почеламутым сылнын лудмыж дене тудын веле огыл, ончышын чонышкыжат логалтыш.

«Морко ӱдыр – пашаче ӱдыр». Кажне ӱдыр, могай-гынат национальный кочкышым ямдылымашке шке мастарлыкшым пыштен, тудын ойыртемже дене сцене гоч палдарыш да жюрилан кочкын ончаш да аклаш темлыш. Коман, шӱрашан, овартыш мелна, салмамуно, катлама, палыш – мом гына тамлен ончаш ыш логал. Элекэҥер гыч Ирина Зорина ончылийсе конкурсышто МарГУ-н студенткыже семын мотор ӱдыр улмыжым ончыктыш гын, тений Эҥерсола школын тӱҥалтыш класслаштыже туныктышо семын пашаче ӱдыр улмыжым темлыме подкогыльжо дене пеҥгыдемдыш.

«Морко ӱдыр – койышан ӱдыр». Тидыже койышланыме нерген огыл, артист койыш дене (мурен, куштен, сылнын лудын) савырен моштымо нерген ойла. Канторъял гыч Аида Иванова, И.Палантай лӱмеш тӱвыра да сымыктыш колледжын студенткыже, самырык-влаклан келшыше сем почеш туге чаткан да куштылгын пӧрдӧ, чӱчкалтыш – кумылымак нале.

«Морко ӱдыр – мотор ӱдыр». Марий тӱр ешартышан кастенысе платье дене сценыште эрыкын да тунамак чонеш пижшын коштын моштымо дене тидым ончыкташ кӱлын. Кушна гыч Анастасия Миролюбова, Нурӱмбал школын тунемшыже, тидлан чыла шотыштат келшен тольо.

«Морко ӱдыр – чевер шӱдыр». Кӧ вара эн-энже: эн чолга, эн поро, эн пашаче, эн койышан, эн мотор?.. Шеҥше школын тунемшыже Лиана Ямнеева, жюрин аклымыж почеш, кажне велымат утларак баллым погыш да тӱҥ сеҥыше лие. Кодшо конкурсышто тӱҥ сеҥыше Альбина Мартьянова, Изи Кугунурышто шочшо да Йошкар-Оласе медколледжыште тунемше, тудлан сеҥышын «короныжым», марий тӱран вуйшӱдышым,  чиктыш.

 

Кумданрак — «Марий Эл» газетын
2017 ий 25 ноябрьыште лекше номерыштыже лудын кертыда.

Юрий Исаков.
М.Скобелевын фотожо.

Опубликовать в Одноклассники

Добавить комментарий