Республикысе Марий тӱвыра рӱдер, Марий Элын Тӱвыра, печать да калык-влакын пашашт шотышто министерствыжын полышыжлан эҥертен, республикын кугыжаныш йылмыже-влак дене рекламе конкурсым увертарен. Тудо кугыжаныш йылме-влакым арален да вияҥден колтымо амал дене эртаралтеш.
Республик кӱкшытан конкурсыш аудио-, видео-, тӱжвал рекламым да информаций конструкций-влакым ямдылыше рекламе агентстве, предприятий ден амалкалче-влак ушнен кертыт.
Республик кӱкшытан конкурс тыгай номинаций-влак дене эрташ тӱҥалеш:
— «Марий Эл Республикын кугыжаныш — марий да руш – йылмышт дене информацийым вераҥдыме тӱжвал средство-влак»;
— «Марий Эл Республикын кугыжаныш марий йылмыж дене печатлен лукмо СМИ-влак»;
— «Марий Эл Республикын кугыжаныш руш йылмыж дене печатлен лукмо СМИ-влак»;
— «Марий Эл Республикын кугыжаныш — марий да руш – йылме-влак дене лекше электрон СМИ-влак»;
— «Марий Эл Республикын кугыжаныш — марий да руш – йылме-влак дене информацийым вераҥдыман тиражироватлыме средство»;
— «Марий Эл Республикын кугыжаныш — руш да марий — йылме дене информацийым тыглай шарыме йӧн»;
— «Марий Эл Республикын кугыжаныш марий йылме дене аудио- да видеопродукций».
Республик кӱкшытан конкурс 2017 ий 1 ноябрь марте, кок тапыр дене, эрта. Тушко ушнышо-влак йодмаш ден материалыштым 1 октябрь марте колтышаш улыт. Анкет-йодмаш ден конкурс паша-влакым (фотографий-влакым) «Марий Эл Республикын кугыжаныш йылмышт дене рекламе конкурсыш» палемдыман да тыгай адрес дене колтыман: Йошкар-Ола, Первомайский урем, 109-ше №-ан пӧрт, Республикысе Марий тӱвыра рӱдер, але тыгай электрон адресыш колташ лиеш: mari-centr@mail.ru. Сеҥыше-влакын лӱмышт 10 декабрьыште, Марий тиште кечын, пале лиеш.
