Марий Элысе Кундыш ял шотан илем администраций вуйлатыше ӱдырамаш эше 2010 ий февральыштак кок йолташ ватыжлан у пачеран лияш полшен. А тидыжым нуным аварийный пӧртлашке илаш пуртымыж дене ыштен кертын.
Но «азап» лийын каен: законым пудыртымым аварийный илыме фонд гыч кӧн у пачерыш куснаш праваже улмым тергыме годым Медведево районысо прокуратура рашемден. Иктыжлан илем администраций вуйлатыше Силикатный поселкышто, весыжлан Сурок поселкышто у пачерым «пуэн».
Кугыжаныш кӱшеш йолташ ватыже-влакым пойдарымылан тудлан ынде мутым кучаш логалеш. Должностной полномочий дене утыжден пайдаланымыжлан илем вуйлатыше шотышто кок уголовный делам тарватеныт.
Л.Камалетдинова.
