Софья Федотовна Рыбакова Шернур район Шӱдымарий школышто ынде 40 ий пашам ышта. Тудо тений августышто Марий Элын сулло туныктышыжо лӱм дене палемдалтын. Россий калык просвещенийын отличникше. Уста туныктышын уло ӱмыржӧ йоча-влак дене кылдалтын, нуным марий йылмылан кумылаҥда.
— Мый шкеже Параньга район Элнет починга ялын ӱдыржӧ улам. Оршанке район педучилищым тӱҥалтыш класслаште туныктышылан тунем пытарымеке вигак Шӱдымарий школышко толынам. Но кӱшыл шинчымашым налме садак шуын, сандене Марий кугыжаныш пединститутым заочно тунем пытаренам.
— Эртарыме икымше урокдам шарнеда мо?
— Шарнем, мылам туныкташ иканаште кокымшо ден кумшо классым пуэныт. Тунам школ пу оралтыште гына верланен ыле. Школжат изи комплектан лийын. Классыштем 26 йоча тунемын. Мутат уке, икымше урокышто тургыжланенам, но мом палымем тӱрыснек пуаш тыршенам. Нунын дене кылым кызытат кучем, илышыштым эскераш тыршем.
— Тендан шонымаште ончычсо тунемше ден кызытсе чотак ойыртемалтыт?
— Тенийсе икшыве-шамыч йӧршын вестӱрлӧ улыт. Тунам икшыве-влак икымше классыш кайымышт годым ни лудын, ни возен моштен огытыл. А кызыт школлан «ямде» толыт манаш лиеш. Тыгак тунам рушла удан мутланеныт гын, кызыт шочмо марий йылмышт деч торлат, утларакшым рушла кутырат.
Кумданрак — «Марий Эл» газетын
2017 ий 21 ноябрьыште лекше номерыштыже лудын кертыда
Лидия ШАБДАРОВА мутланен.
