Кажне ийын Марий Турек районышто 8 Март вашеш идалык мучко шке сай паша дене ойыртемалтше кум чолга ӱдырамашым Ида Ивановна Крылова лӱмеш муниципальный премий дене палемдат. Тыгай пунчалым 2010 ийыште районысо погынымаш луктын ыле. Ида Крылова Марий Турек районысо Арып-Мурза ялеш шочын кушкын. Тудо Марий АССР-ын сулло туныктышыжо, Октябрь Революций орден дене палемдалтын. Ӱдырамаш-влакым саламлымаште И.Крылован ӱдыржо лийын.
Тений тиде премийым Мариец посёлкысо эмлыме амбулаторийын врач педиаторжо Елена Даниловалан, Марий Турек клуб системын Карлыган культурно- спортивный комплексшым вуйлатыше Наталья Ивановалан, Сардаял школысо тӱҥалтыш класслаште туныктышо, районысо погынымашын депутатше Светлана Кузнецовалан районысо администрацийыште эртыше «Тӱням вашталтыше ӱдырамаш-влак» форум годым кучыктеныт. Тудым «Единый Россий» партийын районысо пӧлкаже да районысо погынымаш иквереш эртареныт.
Ончыч ӱдырамаш-влакым партийын районысо пӧлкажым вуйлатыше Надежда Зангирова, район администраций вуйлатыше Сергей Решетов шушаш пайрем дене саламленыт. «Российысе ӱдырамаш-влакын ушемыштым» районышто вуйлатыше Галина Пехпатрова ӱдырамаш мер толкын нерген каласкален. Вара Марий Турек районысо ЗАГС-ын пашаеҥже Галина Орлова, «Знамя» райгазетын редакторжо Лариса Прокушева еш йӱла, райгазетыште ӱдырамаш-влак нерген кузе да мо возалтме нерген каласкаленыт.
Погынышо-влакым эше ик куанле тат вучен. Район администраций вуйлатыше С.Решетов Марий Китня гыч Кибардинмыт ешлан «За любовь и верность семье» медальым, «Идалыкын ешыже — 2016» всероссийский конкурсын « Еш — йӱлам аралыше» номинацийжын участникше лиймым пеҥгыдемдыше медальым Ямбарцевмыт ешлан кучыктеныт. Но моло палемдалтше ӱдырамаш-влакат лийыныт. Мутлан, «Общественный инициативе», «Эн сай ава», «Каблукан бизнеследи», «Автоледи», «Перспективе», «Уникальный профессионал», «Ӱдырамаш — тӱвыра да чон поянлык», «Йӱлам аралыше» номинацийыште ойыртемалтше-влаклан сертификатым пуэныт.
Пайрем эртыме жапыште декоративно-прикладной творчестве ончер, карвинг дене мастер-класс пашам ыштеныт.
Пайремыш Марий Эл Правительстве Председательын администрацийжым вуйлатыше Татьяна Григорьева да Кугыжаныш Думын депутатше Светлана Солнцеван полышкалышыже Людмила Ефремова миеныт.
С.Носова.
