УВЕР ЙОГЫН

Шонымашке шуын огытыл

18 октябрь гыч 7 ноябрь марте «Артек» йоча рӱдерыште ГТО дене всероссийский физкультур да спорт комплексын кеҥеж фестивальжын финалыштыже Советский район гыч йоча-влак вийыштым тергеныт. 

Тений регионласе сборный командыш логалшаш верч ятыр ӱдыр-рвезе таҥасен. Артекыште элнан 85 кундемже гыч тунемше-влак ушненыт. Командыште кажне регион гыч 8 ӱдыр-рвезе (11-12 ияш да 13-15 ияш тунемше-шамыч) лийыныт.

– Марий Элын чапшым Советский район гыч Игорь Майоров (Ургакш), Кирилл Прозоров (Ӱшнӱр), Марий Еменгулова (Ӱшнӱр), Жанна Березина (Ӱшнӱр), Дима Халтурин (Орша школ), Диана Васинкина (Кукмарий школ), У Торъял районысо Немда школ гыч Дима Малисенко, Волжский районысо Пӧтъял школ гыч Юлия Тимофеева араленыт, – ойла вуйлатышышт В.Шабалин. – Йоча-влакын черланымыштлан кӧра икмыняр вид гыч кораҥме. Тений команде 69-ше верым налын. Чыла регион сборым эртен,  а ме – уке. Тыште изиш чарак лийын. Сандене шонымашке шумо огыл. Тидымат палемдыман: Дима Халтурин турникыште шкем нӧлтымӧ дене кокымшо верым налын. Удыр-рвезе-влаклан спорт формым урген пуымыжлан, окса дене полшымыжлан «Акашевский» ООО сурткайык фабриклан тау.  

 

Е.Эшкинина.

Опубликовать в Одноклассники

Добавить комментарий