Шукерте огыл Кужэҥер посёлкысо 2-шо №-ан кыдалаш школышто спорт туризм дене Марий Элын открытый кубокшо эртен. Таҥасымаш спортзалыште лийын. Тушто республикнан тӱрлӧ кундемже (7 район да олала гыч) да элнан куд регионжо гыч 200 участник вийжым терген.
Тыгай сынан таҥасымаш ты школышто икмыняр ий эртаралтеш гынат, шукыштлан тиде таҥасымаш опытым погымо семын лийын.
Спортсмен-влакын пырдыжыш кӱзымыштым, мастарлыкыштым, палемдыме упражненийым ыштымыштым ончаш ятыр еҥ чумырген. Тренер ден спортсмен-влак поснак А. Алафузов ден З.Пайдыгановалан кугу таум каласат.
Озаҥ ден Йошкар-Ола гыч толшо уна-влак сай результатым ончыктеныт гынат, верысе-шамычат медаль деч посна кодын огытыл. Кужэҥер районын сборный командыжын чапшым адакат З.Пайдыганован воспитанникше-влак араленыт. Шке тӱшкаштышт да ийготанышт-шамыч коклаште Д.Иванов, Д.Волков, П.Волкова, П.Тамбасова ойыртемалтыныт.
Е.Эшкинина.
