Ик организацийыште ыштыше кок самырык еҥ шыпак мужыраҥынна.Тидын нерген молым палдараш шонен огынал, но кадр пӧлкан пашаеҥже молыланат тидын нерген увертарен шуктен. Кадр пӧлкан пашаеҥже тыге ыштышаш ыле мо?
А.Маркова.
Йошкар-Ола.
Йодышлан Медведево районысо прокурорын полышыкалышыже С.Г.Захарова вашештен:
— Пашаеҥын еш положенийже нерген сведений персональный данныйлан шотлатеш, сандене тудым аралат. Тиде правовой нормым «Персональный данный-влак нерген» Федеральный Закон да РФ-н Паша кодексше денат пеҥгыдемдалтын. Сандене пашаеҥын персональный данныйжым обрабатыватлымаш закон да моло нормативный правовой акт-влак дене келышышын гына эртаралтшаш: пашаеҥлан пашаш пурымо годым полшымо, образованийым налме але кӱкшырак должностьыш кусарыме, тудын личный лӱдыкшыдымылыкшӧ, ыштыме паша кугыт да качествыжым тергыме да погым арален кодымо шотышто.
«Персональный данный-влак нерген» законын 3-шо ст. 1-ше пунктшо, тыгак Паша кодексын 86-шо ст. 1-ше пунктшо дене келшышын, пашаеҥ-влак нерген сведенийым кучылтмо да йомдарыме шотышто организацийыште эше тыгай иформацийым обрабатыватлыме кӧргысӧ документ-влак лийшаш улыт. Тидын шотышто пашам пуышо ончылгоч шонышаш.
А тиде случайыште пашам пуышо персональный данныйым шарыше кадр отдел пашаеҥ шотышто дициплинарный взысканийым палемден кертеш. Закон дене пеҥгыдемдыме тайным, тыгак вес пашаеҥын персональный данныйжым шаркалымылан, эсогыл статья почешат паша деч посна коден кертыт. Тидыже Паша кодексыштат возалтын.
С.Носова ямдылен.
