Республикын правительстве пӧртыштыжӧ казначействын опытшо, кугыжаныш увер системе-влак шотышто кучем орган-влак дене вашкыл нерген мутланымашлан пӧлеклалтше совещаний эртен. Тудым Марий Эл правительстве председательын икымше алмаштышыже Сергей Сметанин вӱден.
Эртарыме пашан кӱлешлыкшым палемдышыжла, тудо ойлен:
— Тиде теме моткочак пӱсӧ, поснак идалык мучаште.
Тӱҥ докладым ведомство вуйлатыше Ангелина Астафьева ыштен. Тудо РФ бюджет системын бюджетше-влакым шуктымаш кассе обслуживаний гоч ышталтме дене пырля лишыл жапыште Федеральный казначействын увер системыж-влакым вияҥдышашлан тӱҥ эҥертыш ышталтеш манын палемден.
Тачысе кечылан Россий казначействыште икмыняр IT-сервис пашам ышта. Тиде, мутлан, кугыжаныш да муниципал тӱлымаш-влак нерген кугыжаныш увер системе (ГИС ГМП), закупко сферыште единый увер системе (ЕИС), кугыжаныш (муниципал) учреждений-влак нерген уверым вераҥдаш официальный сайт (ГМУ), икмыняр моло. Ангелина Астафьева IT-сервис-влак кокла гыч кажныж дене посна палдарен, Федеральный казначействын Марий Элысе управленийжын кучем орган-влак дене вашкылым ыштен пашам виктарымыж шотышто актуальный йодыш-влак нерген каласкален.
Л.Камалетдинова.