Йошкар-Оласе судышто Марий Элын ончычсо кугыжаныш пого министрже Наталья Хайруллова ден Руслан да Роберт эргыже-влак шотышто тарватыме уголовный дела шотышто колыштмаш эрта.
Ушештарена: ончычсо министр взяткым налмылан, а эргыже-влакын тиде преступленийым ыштымаште коклазе лиймыштлан титаклалтыт.
Икымше заседаний тений 15 октябрьыште лийын. Тунам суд подсудимый-влаклан могай мерым ыштыме йодышым ончен. СИЗО-што шинчымым нуно мӧҥгысӧ арестлан алмашташ йодыныт. Но суд Роберт ден Руслан Хайрулловмытым 2018 ий 27 март марте, аваштым, Наталья Хайрулловам, 22 март марте петырымаште кодаш пунчалын.
Кокымшо колыштмаш 3 ноябрьыште эртен. Тылеч ончычсо заседанийыште Наталья Хайруллова шкенжым титаканлан шотлыдымыж нерген ойлен да молан тыге шонымыжым умылтарен: оксам налмылан титаклат гынат, тудо, «взяточнице», чек вес велне нигунамат лийын огыл, йочаже-шамычым шкетын куштен, шергакан тӱрлӧ ӱзгар ден арверже уке.
Руслан ден Роберт эргыже-шамычат шкеныштым титаканлан огыт шотло, но погынышо-влак ончылно мутым налын ойлаш келшен огытыл.
Тылеч вара залыш «Марийскгражданпроект» акционер ушемын генеральный директоржо Федор Ананьевым ӱжыныт. Хайруллован шонымыж почеш, лачшымак тиде пӧръеҥын показанийжылан эҥертен, тудым титаканлан шотлат.
Умбакыже гособвинитель директорлан йодыш-влакым пуэден. Нуно тӱҥ шотышто Йошкар-Оласе Карл Либкнехт уремыште верланыше мланде участке да тушто улшо теплице дене кылдалтыныт. Ойлымо почеш, тудым Кугыжаныш пого министерстве деч Хайруллован кӱштымыж почеш проект институтлан уставной капиталым кугемдыме шот дене пуэныт. А «Марийскгржданпроект» акционер ушемын 100 процент акцийже тиде министерствын кидыштыже лийын. Ончыкыжым Хайруллова тиде кумдык мландым ала-кӧлан ужалаш шонен. Тыгодым налшаш еҥжым эргыже, Роберт, муын да сделкым ышташ проект институтыш 2016 ий 22 декабрьыште тудак конден манын палемдалтеш. Но Хайруллов тидым шӧрен ойлен да палемден: тиде кечын ни институтышто, ни тудын воктене лийын огыл.
Тылеч вара тиде участке, тудым ужалышаш нерген телефон дене мутланыме записьым колыштыныт. Кажныштыже гаяк Хайруллован фамилийже, эргыжын лӱмжӧ йоҥгеныт.
10 ноябрьыште кумшо колыштмаш лийын. Хайрулловмытын интересыштым ныл адвокат – коктын ончычсо министрым, икте гыч эргыштым – араленыт. Тыгак ты кечын заседанийыш когыньыштынат ватышт толыныт. Но кечывал деч ончыч иктыже веле лийын. Весыже перерыв деч вара толын.
Залыш Наталья Хайрулловам пуртымеке, тудо кычкыралын: «Андрей, свиданийым йод!» Тылеч вара Руслан эргыжым, вара Робертым конденыт. Суд залыште тыгак ончычсо министрын марийже, шочшыжо-влакын ачашт, лийын.
Хайруллова ден эргыже-влакын адвокатыштат чыланат заседаний жапыште нуным кумыньыштым петырымаште шинчыкташ огыл манын йодыныт. Судья тиде йодышым ончыкыжым рашемдат манын каласен.
Тылеч вара залыш кабинетысе аудиозаписьым, телефон фонограмме-влакым колышташ аппаратурым пуртеныт. Икмыняр жап гыч диск-влакым колышташ тӱҥалыныт. Нунат тиде мланде участке денак кылдалтше лийыныт. Хайрулловалан йодышым пуымеке, тудлан адвокатше-влак вашешташ огыл манын темленыт да ончычсо министр тыгак ыштен.
Умбакыже моло записьым колыштыныт.
Тиде уголовный дела шотышто судын заседанийже-влак лишыл кечылаште умбакыже шуйнат.
Л.Камалетдинова.
