Пӱртӱс ош лум велмым пуйто изин-кугун вуча. Кузе от вучо? Юалгыс, вет тудын шыжымсе чевер вургемжым озыркан мардеж пеш шукертыжак огыл, но тыманмеш кудаш шуэн, сандене чара «капкылжылан» юалгын чучде огеш керт. А телыже тений могайрак лиеш ала? Лумлан поян гын, пеш сай, конешне, но кызытеш тудо шкенжым эркын гына палдара – вийже шагал дыр? Адакшым чевер кечат, пуйто уло шокшыжым поген, ырыкташак тырша. Тачыже гын путырак чеверын коеш — уна, Советский район Роҥго селасе корным кузе волгалтара!
Тольык корныжо гына пешыже огеш куандаре. Южо вереже лакыжым шотлен от пытаре. Санденак «Тачысе кечылан тендан кундемыште эн пӱсӧ йодыш могай?» йодышемлан верысе ял шотан илем администрацийым вуйлатыше Майя Васильевна Эшполдина, шуко шоныде, кугун шӱлалтыш:
— Корно. Пеш уда корно. Чыла вережат манаш лиеш. Эн начарже — Киров уремысе ыле, но тений тудым, Юмылан тау, ачален кертме.
Вуйлатышын мутшо почеш, ял-шамыч коклаште эн начарлан Кундышӱмбал — Ашламаш корно шотлалтеш, тыгак Шнаран ден Роҥго кокласе корнат уда. Кокымшыж нерген ойлаш гын, тудо щебёнко дене ыштыме, сандене кеҥеж мучко кок-кум ганаже тӧрлат, но сайын огыт олмыкто. Нуныжым ме ачалышаш огынал — республик кӱкшытанлан шотлалтыт. А моло шотышто каласаш гын, оксам шке кычалман, а окса ял шотан илемын бюджетыштыже моткочак шагал.
— Парыш мемнан шагал — тений планжым темена але уке, огына пале. Ӱмаште изишлан гына темен огынал ыле, — умбакыже ойла Майя Васильевна.
А парышым кондышо организаций Роҥго кундемыште шуко огыл, парня денат шотлаш лиеш: «Роҥго торфобрикетный предприятий» ЗАО, «Роҥго карьер» ООО, пилораме. Пытартышыже официально оформитлалташ огыт тырше. А молыжо (йочасад, школ, Кундыштӱр интернат пӧрт, Ветеран-влакын пӧртышт) бюджет организаций-шамыч улыт. Икманаш, ял шотан илемын бюджетшым пойдараш неле. А умбакыже мо лиеш, шоналтымат огеш шу: кызыт корным ачалыме фонд посна гын, ончыкыжым тиде окса денак тудым эше эрыктыман…
Кумданрак — «Марий Эл» газетын
2017 ий 18 ноябрьыште лекше номерыштыже лудын кертыда.
Г.Кожевникова.
М.Скобелевын фотожо.
